Владимир Путин: «На хъунмасса гъирарай увкIра зучIан»

[dropcap]С[/dropcap]ентябрьданул 12-нний АьФ-лул Президент Владимир Путин ва ДР-лул БакIчи Владимир Васильев Бущихъав хьунабавкьунни 1999 шинал дяъвилул иширттавух гьуртту хьуну бивкIсса
ополчентуращал.

Хьунабакьаврий В. Путиннул увкунни:
— На зухьхьун дакIницIану аьла-ссалам буллай ура, ттун ччай бур зухь барчаллагьгу учин ттуйнма оьвчаврихлу. Зу ттуйн оьвкуна тIайланмасса эфирданувух, мунияту на хъунмасса гъирарай угу-увкIра зучIан. Ванияр 20 шинал хьхьичI Дагъус­ттаннайн ххявххун бивкIсса дунияллул халкьуннал дянивсса къачагътурал кьюкьрайн лажин лажиндарайн данди бавцIуну, зу бурувччуссар зулва Аьрасатгу, чIиримур Ватангу, щалва Дагъусттангу. Та чIумал зу ккаккан бувссар цукун дуру­ччин аьркинссарив Ватан, цукун гьаз хьун аьркинссарив аьмсса нигьачIаврил хьхьичIун. Ккав­кказнаву даимангу ляличIисса кьиматрай диркIссар чувшиву, яхI-къирият, Буттал улклух­сса ччаву.

Та нигьачIаву дирсса чIумалгу аьлтту хьуссар ми яла яргми хасиятрал лишанну.
Зун хъунмасса барчаллагь хьуннав. Тай ишру барча тIунгу захIматри, цанчирча, цуксса хIайпнугу, чIявусса хьуна ливтIусса ва бивщусса. Му мукуннугу, ттун ччай бур, тай ишругу дакIнийн бивчуну, зул чувшиврунгу, виричушиврунгу багьайсса кьимат бищун, зущал ххаришиву кIидачIин.

На цIана тIутIив дишав гьайкалдануцI. Гьайкал ххаллилсса дур. Тукунсса гьайкалданул чIюлу бантIиссар Аьрасатнал ягу Европанал ччимур хъуншагьрулул майдан.
Цал ттигу барча 20 шин шаву!
Муния махъ В. Путиннул ихтилат бунни кIанттул инсантуращал, ополчентуращал.

ХIадур бувссар
ХI. Аьдиловлул