[dropcap]М[/dropcap]уданмагу, цIанакулсса чIумалгу фельдшер хъанай ур шагьрурдайсса ва районнал 

медучреждениярттайсса хIакинтурал кумагчину.Шяраваллил медпунктрай тIурча, мунал щаллу дуллай ур гьарца хIакиннал дан багьаймур.

Шяравусса фельдшер му личIиссава даврил журалул инсан хъанай ур. Мунан багьлай бур зун, хьхьу-кьини къакуну, шяраваллил агьалинал цIуллу-сагъшиву дуруччаврил цIаний. Мунал кьинилул мутталий данмур минутIирттай чирчуну дунугу, чIявуну шавай зана шай хьхьудяризая махъ, чIунну шай хьхьурду къашайшалачIа дирчуссагу. Медициналул зузалал хасиятрал гьанулий дикIан аьркинни тIайлашиву, цала дуллалимунил жаваб дулун бюхъаву, инсаншиву, дакI хъиншиву. Ми циняр лишанну дия чIярусса шиннардий жул шяраву, Ххюлусмав, хъинну бусраврай зий бивкIсса Аьлишаева Сарижатлул.

---

Гьашину августрал 23-нний Ххюлуссуннал шяравун бувкIун бия чIявусса хъамал, фельдшер-акушернал пунктрай (ФАП) зий бивкIмигу дакIнин бивчуну, лахъисса мутталий хъинну ххуйну цилла даву би­ттур дуллай бивкIсса Аьлишаева Сарижат Оьмарил душнил цIа чирчусса улагу ФАП-рал чIирай дацIан дуван.

Ула дацIан дуллалисса кIанай хъуннасса батIаву хьуна. Ми­ккун бувкIун бия циняв гъан-маччами, хъамал, шяраваллил жямат.
1948 шинал Къабардиннаву медучилищагу къуртал бувну, бувкIун бур Сарижат Буршайн. Шагьрулий хъун хьусса душ 22 км. манзилданий райцентрданияту, я бахьтта, я чай бурттий, ягу машинарттай занай, байбивхьуну бур зий. ЧIирисса чIумуй, цила даврицIун шяраваллил хъаннил дайсса давурттугу нани дурну, зунттавува яхъанай бивкIсса кунма, жяматравух хIала бувххун бур. ДакIнихтуну зий бунутIий, мунияту хьуну бур маслихIатчигу, ххаришиврул ва захIматрал уртакьгу. Хъинну бусравнугу бивкIун бур цинявннан.

Буршиял ЦIаххаев Ибрагьиннул Сарижат бусса чIумал муния «Илчи» кказитрай чивчуну бия: «Инсан къуллугърал акъарча гьаз айсса, инсанналли къуллугъ гьаз байсса. Цила инсаншиврул, пиша ххирашиврул Сарижат щалагу жяматран бусрав хьуну бур, ччан хьуну бур», — тIий.
1953 шинал Сарижат щар хьуну Аьлишахъал ХIасаннун, бивзун бур Ххюлуссуннал шяравун. Мунал къаттагу хъамал ххирасса, бухху-букку чIявусса, барачатсса къаттану бивкIссар. Цуксса захIматну бунугу, мукьва оьрчIгу ябуллай, хъамалгу кьамул буллай, цила давугу бусраврай, жямат рязину биттур дуллай бивкIссар Сарижат Ххюлусмавгу.

Сарижатлун ула дацIан дуллалисса батIаврий махъру лавхъуна мунищал зий бивкIсса, му ххуйну кIулсса инсантурал: Гъапуров Оьмардул, Сайдиева РайхIанатлул, Къунжуева Маданиятлул, Михадова Написатлул, Михадов Саэдлул, цIанакул ФАП -рай зузисса Къиваева Марияннул, Къунжуева Жамилатлул, Хъуннащиял шярава­сса Сарижатлул ссурахъил Халуннул.
Сарижатлул цIа дирзсса, цIуну хIакин хьусса арснал душнилгу бувсуна буттал ниттил цIа циллагу лайкьну дуруччиншиву.

Ула дацIан дайсса кьини шяравун бувкIун бия Сарижат Оьма­риевнал арсваврал дусталгу – Москавлиясса Зелен Александр (генерал – полковник, хьхьичIава военно-воздушный армиялул хъунаману ивкIсса), Некрасов Владимир (Газпромрал хъунама хIакин), АьбдурахIманов Шамил, Ттаттаев Эмил, Къабардин-Балкьарнавасса, Сочилиясса ва цаймигу шагьрурдаясса инсантал. Миннан цанма Сарижат къаккавккун, къакIулну бунугу, бувчIлай бия жяматрал ванил чулухуннайсса бургавугу, ванил хIурматгу цуксса лахъсса даражалий бивкIссарив.
Сарижат Аьлишаеван райкомрал, райисполкомрал чулухасса чIярусса грамотар­ттугу дуллуссар, мунил давугу цайминнан эбратну дишайсса диркIссар.

Жул Ххюлуссуннал жяматран Сарижат Оьмариевна тачIав дакIния къабуккантIиссар, кIа­нил цIа шяраваллил тарихравугу личIантIиссар.
Арсен Магьдиев