[dropcap]Л[/dropcap]аргсса нюжмаркьини Лакрал театрданул ккаккан бунни Казбек Мазаевлул пьесалийсса, тамашачитурангу хъинну ххира хьусса, спектакль – «Гъази-Гъумучиял серенада». Режиссер Дагъусттаннал Халкьуннал артист Аслан МахIаммадов.
Зулайхат Тахакьаева
Ва базилух, 150 билет лавсун, цала шяраваллил агьулданул чулухасса акция дунни Ккурккуллал шяраватусса ХIажиев СалихI Гиланил арснал.
СалихIлул ттинингу чIярусса чирилул давуртту дурунни цала буттал шяравугу, Лакрал райондалийгу.
— Ва акция ттул уссил хас дурунни, Театрданул шингу духьувкун, Лакрал театрданул цалчинсса пишакарсса режиссер Павел Васильевич Джапаридзел аьпалун, цувгу хъанай ур жул ттаттал Иосиф Васильевич Джапаридзел хъунама уссу, — тIий бур СалихIлул ссу Ариза.
— Джапаридзехъал кулпатрал агьамсса кIану бувгьуну бур Дагъусттаннал магьирлугърал, кIулшиву дулаврил оьрмулуву. Ми бивкIун бур республикалий цалчинсса пионертал, комсомолтал, партиялул зузалт. Ттул ттатта Иосиф Васильевичлул сакин бувну бур Дагъусттаннай цалчинсса Пионертурал къатта.
Спектакль хъинну ххуй бивзунни – тяхъасса, лаласун бигьасса. ХIайран бунна актертурал тIуркIулул. Ттун къакIулссия жула чIивисса миллатрал укун гьунар бусса актертал бушиву. Рязину ливчIунни бувкIсса цинявппагу ттул шяравучуталгу. ХIарачат банну жула аьзизсса театрданущал дайдирхьусса дусшиву дяличIан къаритан, — тIий бур Ариза.
Шиккува кIицI бан, так билетру ласаву бакъасса, Ариза ХIажиевал га хьхьуну спектакльданийн наниминнан театрданул жанахIраву сакин бувну бия фуршетгу.
Чансса бакъая га хьхьуну спектакльданийн бувкIминнал дянив цалчинну Лакрал театрданул спектакльданийн бакIрайн багьсса тIиссагу.
