Август зурул 29-нний МахIачкъалалив Национал библиотекалуву хьунни ДР-лул культуралул лайкь хьусса зузала, АьФ-лул Журналистътурал союзрал член
Эльмира Кожаевал 1999 шиналсса аьрали иширттая чивчусса макьалартту цачIун дурсса луттирал презентация.
Имара Саидова
Шикку гьуртту хьунни паччахIлугърал властьрал органнал вакилтал, журналистътал, чичулт, шаэртал ва ополчентал.
Презентациялул мажлис бачин бувсса ДГУ-лул электрон СМИ-лул кафедралул каялувчи Илман Алипулатовлул дакIнийн бувтуна, 20 шинал хьхьичIсса дяъвилул иширттая буслай, Кожаевал бувсса захIматрая.
— Ва луттираву кIицI лавгсса ишру хьуссар унгу-унгусса дяъвилий. Та дяъви сававну Дагъусттаннал миллатрайх кьини дурккун диркIссар. Дагъусттаннал агьалинал чумартну лархъссар тай оьсса кьинирду ва тасттикь бувссар Дагъусттан мудангу Аьрасатнащал цачIу бикIантIишиву,- увкунни Илман Алипулатовлул.
Луттирал автор Эльмира Кожаевал кIицI лавгунни цила чивчуну бушиву цуппа барану бивкIсса 1999 шиналсса иширттая. Бувсунни мукунма, аьрали иширттая чичлачийни, Аьрасатнал Обороналул, ДР-лул министерстварттал ва ополчентурал хроникалийн чул бивщуну бивкIшиву.
Хъирив ихтилат бувсса ДР-лул Музыкантътурал союзрал председатель Хан Башировлул барчаллагь увкунни авторнал бувсса захIматрахлу ва бувсунни уттигъанну Оьруснал театрдануву ва ЦIуссалакрал райондалий дурну диркIшиву «Агрессиялийн къаршисса культура» тIисса акция.
МВД-лий зий ивкIсса Камил ХIажиевлул кIицI лавгунни Кожаеващал кIул хьуну ивкIшиву дяъвилул ишру нанисса чIумалва.
— Ттуйн тапшур бувну бивкIссар Эльмира мюхчан бан. Жу, информация кIул буллай, мунищал занай бивкIссару Чачан Республикалул дазурдайх. Ванил цила луттиравугу балжину чивчуну буссар ми иширттая, — увкунни мунал.
Презентациялийн бувкIминнал кIицI ларгунни та чIумал, душманнайн данди бувккун, цачIун хьуну бивкIсса Дагъусттаннал миллатирттал дурсса къучагъшиву, цашиву.
