Хар-хавар бакъасса дяъвилул гьулусан дурну диркIсса та 1999-кусса шинал оькъав­ку хъамаллурая Дагъусттан буруччин цачIун хьуну бивкIссар циняв – талатаврил дазуймигу, къинттуллухмигу.

Гьурттуну бивкIссар хIатта музыкантъталгума. «Ссалам алейкум» тIисса Дагъусттаннал Музыкантътурал союзрачIасса группалул ккаккан дурну диркIссар ихIсандалул ххуллийсса концертру. Мунил каялувчинугу ивкIссар АьФ-лул искусствалул лайкь хьусса зузала, пианист Хан Баширов.

Ккаккан дуллай бивкIссар концертру ЦIуссалаккуйсса дяъвилул дазурдацIухгу, госпиталлайгу, лихъачалтрал дянивгу. Му акциялун цIагу диркIссар «Агрессиялийн къаршисса культура» тIисса. Му группалул музыкантътурал хIалал бувссар Аьра­сатнал аьралуннал командованиялул чулухасса барчаллагьрал махъругу.

АхIмад Идрисов