Пашанал арс Кьурбан АхIмадов увну ур ЦIуссалакрал райондалий ЦIуссаккуллал шяраву. Кулпатраву ва ивкIун ур хъунама арс. Мюрщими уссурссуннах уруглай, щинав лаглай, къатта-цIу лакьин ниттин кумаг буллай икIайсса ивкIун ур. Цахъи хъуна хьувкун гъинттул чIумал ниттин кумагран колхозраву зун лагайсса ивкIун ур.
Цумур-цагу дяъвилий ятIатIар бакъашиврияр, увччусса кIану къакIулшиврияр захIматсса цичIар къадикIайхьунссар. Цуппа бивкIунияр ятIатIар бакъашиву захIмат хьунссар махъсса гъан-маччанан. ДачIи шинай ятIатIар къабивкIун бур лахъазанттуй ивкIсса Кьурбаннуя, кIулну къабивкIун бур мачча-гъаннан ванал бакIрачIан бувкIмур.
Увччусса кIанугу кIулну, гьаттайн биян хъанай бивкIссания, ивкIушиврун ккалли къабавияв…
ТалихIиннаран, чапхунчитураща итххяххан ан бювхъусса Аьли Куркиевлуяту кIул хьуну бур Кьурбан ясир агьшиву.
Чапхунчитурал ясир увну Чачаннавун увцуну бувкIсса Кьурбаннун ттику мукуна ясир увсса цала даврил уртакь, милицанал прапорщик Куркиев Аьли бакIрайн агьну ур. Кьурбаннул бувсун бур «Телевышка» пострай хьусса къизгъинсса талатаврия, бувсун бур ярагъуннил балгусса хIат-хIисав дакъасса душманнал аьралуннайн цукун данди бавцIуну бивкIссарив цивппа. Щавурдал оьлицIал хъанахъисса Мутай ивкIун ур Кьурбаннухь утти жущава бан шайсса цичIав бакъарча, бюхълай бунува, лихъу, ххассал бува вила оьрму тIий.
-Шайссияв ттуща мукун кьадарсса тIул дуван. Цукун уругантIиссияв на инсантурал иттав, — буслай ивкIун ур Кьурбан.
ПIякь увкусса ярагърал кIулшилия гьан аннин талай ивкIун ур ва. Кьурбаннул бувсун бур Аьлихь лахъазанттуйсса талатавриву биялсса боевиктал бат бувшиву, миннавух тайннал командирнал уссугу ивкIшиву. Ванан бувчIлай бивкIун бур цува боевиктурал сагъну къаитантIишиву. Тавакъю бувну бур Аьлихь, балики сагъну итххяххарча, цала кулпатрачIан, оьрчIачIан иву, цува ккавкшиву буси куну. Цуманан ци чивчуну буссарив къакIуллича куну, Аьлилгу буллуну бур Кьурбаннухьхьун цаламинначIансса чагъар. Сайки кIива зурува боевиктал Кьурбан увцуну лавгун бур. ЛичIи хъанахъисса чIумалгу, Аьлил иттавгу урувгун: «Циняв жуламиннахь ссалам буси», — куну бур Кьурбаннул.
Так дачIи шинава ясиршивруща итххявххун махъ кIул хьуну бур Аьлин Кьурбан зана къавхьушиву. МаркIачIан чIумал, Аьли шавай увкIсса бавну, бувкIун бур Кьурбаннул кулпат ласная цичIав кIулну бурив ккаккан. Аьлил бувсун бур цанма кIулмур. Аьли зана хьувкун циламагу хьунссар тIисса умудрай лавгун бур вайнначIату Миясатгу.
Мунияр махъ, ласнах луглай, муная кIул буллай, цимилгу лавгун бур Миясат Мичиххичнавух. Ва Хаттаблущал, Басаевлущал хьунабавкьуну бур. Амма цичIав кIул бан къавхьуну зана шайсса бивкIун бур.
КьурчIи бизлай бивкIун бур Кьурбан боевиктуращал ухьунссар тIисса махъасса хавардугу. Тамансса шиннардий шанма мюрщисса оьрчIащал ливчIсса Миясатлун оьрчIан ппу акъашиврул пенсиявагу буллай къабивкIун бур, цайминнан дусса куклушиннарду вайннан къадиркIун дур.
Кьурбаннун диркIун дур 35 шин. Та чIумал ванал чIивима арснан диркIун дур 5 шин.
Махъ кIул хьуссар Кьурбан боевиктурал аьщун ивзшиву. Амма хIакьинусса кьинигу кIулну бакъар гъанчунан му чув увччуну уссарив.
Увччусса кIанугу кIулну, гьаттайн биян хъанай бивкIссания, ивкIушиврун ккалли къаавияв тIун бикIай укунсса иширттащал хьунабавкьуми.
