Августрал 14-нний ДР-лул ХIукуматрал батIаврий ххал бивгьунни «ДР-лий градостроительствалул иширттаву паччахIлугърал информациярттал система зузи даврил хIакъираву» тIисса масъала.
Хъунмур махъ лавхъунни ДР-лул Архитектуралул ва градостроительствалул комитетрал председательнал буржру чIумуйсса бартбигьлагьима Назир ХIусайновлул. Мунал тIимунийну, паччахIлугърал информациярттал система сакингу дурну градостроительствалул иширттаву зузигу дуллан тIий бур АьФ-лул субъектирдал исполнител властьрал органнал, ягу миннал идарарттуну хъанахъисса паччахIлугърал бюджетирттал учреждениярттал. Ми органну ягу идарартту хъанахъиссар паччахIлугърал информациярттал системарттал операторталну.
Назир ХIусайновлул гьартану бувсунни информациярттал системарттаву цукунсса документру бикIан аьркинссарив, ми цукун щурущи буллан аьркинссарив, цукунсса информация бикIан аьркинссарив.
Информациярттал система зузи дуллан аьркиншиврия бувсунни ДР-лул информатизациялул, связрал ва агьалинансса коммуникациярттал министр Сергей Снегиревлул. Мунал тIимунийну, му ишла дуллай байбишин тIий бур цаппара шиннардил мутталий. «Байбихьулий ишла дуллан аьркинни «ДР-лул информациярттал ва коммуникациярттал инфраструктура» тIисса паччахIлугърал программа», — увкунни министрнал.
Яла ихтилат бунни ДР-лул хIукуматрал Председательнал 1-ма хъиривчу ХIажимахIаммад ХIусайновлул.
ДР-лул ХIукуматрал Председатель Артем Здуновлул тIимунийну, система аьркинссар ва мунал тапшур бунни батIаврил протоколданийн ми гьарзат ласун ва мунинсса арцугу лякъин.
