Ларгсса нюжмардий ДР-лул ЦIуллу-сагъшиву дуруччаврил министерствалий гьарта-гьарзасса медициналул пишакартурал батIаву хьунни.
Ва дачин дурну ия министерствалул каялувчи Жамалуттин ХIажиибрагьимов. БатIаву дайдишин хьхьичI министрнал шадлугърал тагьарданий цIуллу-сагъшиврул аралуву хьхьичIунсса ккаккияртту хьун дурсса зузалтран цIарду ва бахшишру дуллуна. Республикалул азарханардай зузисса 10 хIакиннан дуллуна «ДР-лул лайкь хьусса хIакин» , кIия инсаннан –«ДР-лул лайкь хьусса зузала» тIисса цIарду. Вай барча бан ва республикалул медицина лахъсса даражалийн дуцинсса хIарачатрахлу барчаллагь учин шиккун мукуна увкIун ия ДР-лул ХIукуматрал председательнал хъиривчу Анатолий Карибовгу.
З.АьбдурахIманова
БатIаврил дайдихьулийва гьаз бувна республикалий цинявннан аьмсса «медосмотр» цукун, ци даражалий най дуссарив бусласисса ихтилат.
Штатрай акъасса республикалул хъунама терапевт МахIаммад Аьбдуллаевлул бусаврийну, лавгсса ххюва зурул мутталий Дагъусттаннай диспансеризация дурну дур 180 азара инсаннал. Вай хъанахъиссар ххал бан ккаккан бувсса агьалинал 88,1 %. Диспансеризациялия махъ личIи-личIисса азарду ляркъуну, мюрш бивкIсса хъиривлаявуртту дуван хIакинтурачIан тIайла увккун ур 79 азара инсан. ЦIуллу-сагъшиврун нигьачIийшиву дуну лявкъуну ур 49 азара инсан. Ва категориялийн багьну бур артериал давление, холестерин лахъсса, буч-кьучсса халкь. Чурххаву нигьачIисса дурухлурду ляркъуну, цIунилгу медициналул куртIсса хъиривлаявуртту дувансса сияхIрайн лавсун ур 129 инсан . ОьрчIалмур диспансеризациялия гьарта-гьарзану бувсунни республикалул хъунмур педиатр Валентина Костровал. Лавгсса 6 зурул мутталий жучIава 254 азара оьрчI ххал увну ур. Аьмну 2019 шинал ххал бан ккаккан бувну бусса бур балугъравун къабувхсса 760 азарва оьрчI. Профилактикалул давуртту дувантIиссар ятинну ливчIсса ва захIматсса тагьарданийсса 7 азара оьрчIал хIакъиравугу.
БатIаврий диспансеризация хьхьарану нанисса медициналул идарарттал хъунминнай дюъгу дирхьунни, хъирив лавну, ччясса мутталий даву щурущи дуван. Министрнал тIалав бувна хъуннасса къулагъас дуван хIакинтурал агьали флюрография дуван тIайла буккаврих. Ва даву ххуйну най дусса дур Сергокъалаллал райондалий. Хьхьарасса къулагъас дусса дур Къайтагъуллал райондалий.
