Дагъусттан Республикалул культуралул министерствалул щурущи дурсса «СахIналул магьиртал — Дагъусттаннал агьалинан» тIисса программалул лагрулий Лакрал паччахIлугърал драмалул ва музыкалул
театрданул артистал цIунилгу лавгунни Лакрал ва Ккуллал районнал щархъайх гастроллай, цавай «Лакку балайрду» тIисса программалущал – КIундив, Мукьархъиял махIлалийн, Хъусрахьхьун ва Къянив. Цавайгу «Даркку Дагьантту» тIисса хъярч-махсаралул программалущал – Гъумукун, ШавкIрав, Ккулув.
Зулайхат Тахакьаева
Хъунисса щархъайх театр гьарца шинал лагайсса бухьурчагу, мюрщи щархъайн къалавгун, шинну чIарах дуккай. Цамур дялахъру дакъасса кIанттайсса агьлу театрданух мякь бувккун бикIай, артистурал чулухунмайсса хIурматгу вайннал цайминнаяр ххишаласса бикIай.
Ххарину кьамул бунни ХIажиаьли ХIажиаьлиев, Луиза Шагьдилова, Саният Рамазанова, Халисат Батирбекова, Арслан Шагьмарданов ва жагьилсса артист Ибрагьим Рабаданов КIундив ва Къянив. Мукьархъиял махIлалул агьлу тIурча ххаришиврул аьтIий бия. Ва чулийнмайсса ххуллу гьан-бучIан жапасса буну, дуниял дарщуни тIурча, шиха машиналуща букканмагу къашайссар, Мукьархъиял махIлалул щархъайн театр къабувкIун хьуну дур зувиллийхъайсса шинну.
Бувагу ца чирахъ лавхъсса (гъинттул бигьалаган бувкIсса ца-кIия инсан хIисав къаувну) Ппаласмав тIурча, Лакрал театр бувкIун бур цалчин. Ппалассуннал шяраваллил цIа дирчIан къаритлатисса Хоролова Сарижат-бава дайкъалитIавай зукьлай дия артистураха. Увагу ца инсан усса шяравалу дурчала куну, баччибакъулшиву къадурну, авлахърайва музыкалул аппаратурагу бивхьуну, зунттурдалгу, ххяллалгу тикрал дуллалисса даражалий ххаллилсса концерт ккаккан дурунни артистурал. Балайрдал чIурдал кIункIу бувну бавтIуна шиккун чIаххувсса яруссаннал Щангъи-Щитуллал шяраватусса тамашачиталгу. Цайми щархъавунияр гьавас буну бия артисталгу. Сарижат бава цурдагу дия хIала дурххун, артистуращал балай тIий.
Сарижат щар хьуну бивкIун бур Бюхттиял шяравун. Бусса оьрмулий ялапар хъанай бур буттал шяраву. Ванил арсру Тажуттин ва Идрис бур ишру бавчусса инсантал, ца Санкт-Петербурглив, ца Ростоврай ялапар хъанай ур. КIи рутан вайннал цачIанма буцайхтугу, гьантри чIарах букканнин, шаппай биян бувара цув тIий, къабацIайсса бур. Урив школалий зий, Мукьарив ялапар хъанахъисса душнил байрандалийн-за бувцусса чIумалгу, цила шаппайн ливхъун бачайсса бур.
Лакрал театрданул каялувчитал барчаллагьрай бур Ури-Мукьардал шяраваллил администрациялул бакIчи Шакир Рамазановлуйн ва Ппаласматусса Нурислан АьбдурахIмановлуйн артистурах дурсса къулагъасрахлу.
