Ххассал унни неххаща арулла шинавусса Шарип

Уммукусум Тажибова

Ттигъанну Уммукусум Тажибован бартларгунни оьрмулул 14 шин. Циннагу, щала кулпатрангу оьрмулухун дакIния къадуккансса хьунни ва базилух Уммукусум бувсса кьини.

Циламур оьрмулунсса нигьачIаврия хIучI къакуну, ванил ххассал унни неххал лавсун нанисса оьрчI.
Шагьрулия каникуллай бигьалаган КIулушацIрал шяравун бувкIсса Уммукусум чIахху-чIарахсса оьрчI-душваращал лавгун бивкIун бур неххацIун, бувсса кьини кIицI лаган.

[dropcap]О[/dropcap]ьрчIру бигьалаг­лай бунува, неххал зуманицI аьлахълахъисса Уммукусумлул чIаххувоьрчI, арулла шинаву­сса Шарип, ччех ивкIун, неххал лавсун авчуну ур.

— Хьумур жун найбунува къабувчIуна, — дакIнийн бутлай бур Уммукусум. — ОьрчIал бакI щинал лув личIлан диркIукун, яруннин чани лавсун, ххявхра неххавун…

Цукунсса оьзру къахьун­ссия, Уммукусум сивсуну неххавун къаххявхссания, хъуними кумаг­ран бучIаннин – Шарип увгьуну гьанссия.
Шариплул нину-ппу барчаллагьрай бур Уммукусумлуйн ва ванил нитти-буттайн. Душнил къучагъсса тIул ларайсса наградалун лайкьссар тIий бур.

ПатIимат Шихшаева