Рамазаннул арс СантIуев Аьлил
Авгъуст зурул 13-нний лавгунни дунияллия 1-мур ЦIувкIратусса махъа-махъма фронтовик, полковник, ххаллилсса зунтталчу, Рамазаннул арс СантIуев Аьлил.
Ва аьрайн увцуну ур 18 шиннагу хьун дурасса оьрмулуву. Донбасс, Днепропетровск шагьрурду душманная мурахас буллалисса талатавурттаву хьхьичIун ливчуну тIий лайкь хьуну ур ЯтIул ЦIукул орденналун. Гьуртту хьуну ур Польшанал шагьрурду тархъан буллалисса талатавурттавухгу, Ххувшаврил байран хьунадаркьуну дур Бреслау шагьрулий. Дяъви къуртал хьуну махъгу Берлиннайва ацIан увну ур Союзрал контрольданул комиссиялуву (укунсса комиссияртту таний дунияллий бувагу шанма бивкIун бур: совет хIукуматрал, американал ва ингилиснал). Батайскалий, Ростоврай, Ураллай, яла махъ МахIачкъалалив зенит- артиллериялул батареялуву къуллугъ буллай ивкIун ур.
Аьрали къуллугъ кьабитайхту, полковник СантIуев зий ивкIун ур «МахIачкъалаллал сельхозтехника» тIисса предприятиялул хъунама инженерну. Цува дунияллия гьаннин ва уссия МахIачкъалаллал жагьилтурал насихIатчину, вузирдаву, школарттай, колледжирттаву ччя- ччяни хьунаакьайссия дуклакиминнащал. Республикалул ва шагьрулул хъуниминнал Ххувшаврил байрандалул гьантрай ванайн цачIанма оьвчайссия.
ЦIувкIуллал жяматран оьрмулухун бусрав хьунсса даву дурссар Аьлиллул цала ссурахъу СантIухъал МахIаммадлущал уртакьну ЦIувкIуллал Жяматийсса совет хIасул баврийнугу. Гьамин, вайнналли шагьрурдайсса ЦIувкIул Ххувшаврил байрандалий МахIачкъалалив цачIун батIаврил гьану бивзссагу. Аьлил Рамазанович мудангу чялишну хIала уххайссия шяраваллил жяматрал оьрмулул иширттавух. Ва ия дакI цIимисса маслихIатчигу, чIарахацIугу, чул бищай чIирагу. Вайннал ужагърай хъамал чан къашайссия.
Аьлил дунияллия лагаврил кьурчIишивугу кIидачIлай, жижара буллай буру ванал душнихь Зинаидахь, куявнахь МахIаммадбаглухь, наслулухь, гъан- маччацириннахь. Аьлил Алжаннул ххари уваннав, гьаттай нур дизаннав!
1- мур ЦIувкIуллал жямат
Чанна лархъсса симангу, Бюххансса ихтилатругу
ДакIнихтунусса кьурчIишивугу кIидачIлай, жижара буллай буру 1-мур ЦIувкIратусса ХIусайханова Зинаидахь, ванил аьзизсса ппу, Хъун дяъвилул махъа-махъминнавасса ца
СантIуев Аьлил
дунияллия лагаврийн бувну. Жун къахъамаританссар гьашинусса Ххувшаврил байрандалий вайннал ужагърай Аьлил Рамазановичлул лагмагу лавгун дурсса щябикIавугу, ветераннал чанна лархъсса симангу, бюххансса ихтилатругу.
Аьлил Рамазановичлул бунагьирттал аьпа баннав, рухI бигьаний дишиннав, махъминнал оьрмурдай барачат бишиннав.
Мариян Илиясовал
цIанийсса фонд «Дараччи»
Кьадинал душ Какваева Сарат
Вай гъинтнил ххаллилсса гьантрай, жугу хъирив хъювхъу тIутIи бувну лавгунни жул чув-адаминал куннасса къириятрал заллу, ас-намусрал бувчусса хъамитайпа, ШавкIуллал шяраватусса Какваева Сарат Кьадинал душ.
Сарат бия цуппа бусса кIанттай цIу-цIанпир ххишала байсса хъамитайпа, ххирая ласнал ляхъиндалунгу, щарнил жяматрангу. Къашавайвагу бакъанма, цакуну, цинявгу мазру хъамабитан бувну, лавгунни дунияллия Сарат.
Шанма оьрчIгу хъуни бувну, аьзизсса ласнащал яхъанай буссия Сарат. Зий бикIайссия жура-журасса давурттай, ласайссия бахшишру ва хIурматрал грамотарду, уттигъанну, бигьалагангу аьркиннихха куну, лавгссия давриягу.
Къакьисмат бувунни Заннал Саратлун бигьалагансса мутта, бувцунни цачIанмайва. Ци банссар, ххуймири тIархха Занналгу буцайсса, Саратгу жущалва къабивтунавхьур, алжаннул хIурулъэн баннавча Аллагьутааьланал.
Ссавур Заннал дулуннав зухьхьун, оьрмурдай барачат бишиннав ТIайпур, Рашид, Гилани, Жамбул.
Сарат, жул чаннацIукуй,
Чаннаннил чявхъа бувтIрив?
Дунияллул ххазинай,
Щюлли хьхьиривун бювкьрав?
Малаикнал хъаттирдай
Ссавруннайх лехлай бурав,
Юхсса, хIурулъэн хьуну,
Жаннат-алжаннув бурав?
Заннал мугьлат бакъаяв
Ххиранахь бавчура чин,
Чут бувтун ливчI ав куна,
Цан кьаитав аьзизма?
Ласнауссил щар Сурая
Жуйн бивтсса баргъ инаяв
Ниттил Асватлул аьпалун
Нурданул чани бияв,
Чинарданул мурхь бияв,
Гьарнайх цIими бачIайсса
ДакIнил заллугу бияв.
ЧIяйннал сий виву дия,
Райондалий цIа дия,
ЦIупар кунмасса бияв,
ЦIу бия гьарца мукъуй.
Вил жу арула ияв –
Арулагу – ца мурад.
Жуха бувсса вил захIмат
Арулххуттай бацIаннав!
Ина тарбия бувми
Мудан виха зукьлай бур,
Нину Асват – лакрал сий
ДакIниву ядуллай бур.
Агьлу- авадрал
цIанияту Мусттангир
