Август зурул 19-нний Дагъусттаннал «Мостоотряд-99» компаниялул цIуну бувсса Гагариннул цIанийсса Саратовуллал аэропортрал кьамул дунни ххал дигьлагьисса цалчинсса рейс.
Имара Саидова
«Внуково» аэропортрая Саратоврайнсса самолетрал цалчинсса рейсрай левххун бувкIунни АьФ-лул ПаччахIлугърал Думалул председатель Вячеслав Володин, Росавиациялул каялувчи Александр Нерадько, «Регионал аэропортирдал» холдинграл заллу Виктор Вексельберг, «Граждан аэропортирдал администрациялул» ФГУП-рал каялувчи Юрий Жирков, «Мостоотряд-99» компаниялул советрал директортурал каялувчи, ДР-лул Халкьуннал Мажлисрал депутат Хучбар Хучбаров ва цаймигу.
Вячеслав Володиннул кIицI лавгунни Саратовуллал аэропорт личIи-личIисса шагьрурдаясса чIярусса самолетру кьамул дайсса, агьалинал тIалавшиннарду биттур дуллалисса даражалийн буцинсса пикрилий бушиву.
Аэропортрай хьусса батIаврий Вячеслав Володиннул бувсунни Гагариннул цIанийсса аэропорт хьхьичIунмай баву мурадрайсса давуртту дачин дурну бушиву. Саратовуллал областьрал губернатор Валерий Радаевлул барчаллагь увкунни аэропортрал комплекс буллалисса проектравух гьурттушинна дурминнахь.
Аэропортрал комплекс буллай байбивхьуну бур 2012 шиная шинмай. 2015 шинал «Мостоотряд-99» компаниялул дурххуну дур аэропорт бувансса ихтияр. Шиккува кIицI лаган, «Мостоотряд-99» компаниялул ккаккан дурсса чIумуяр хьхьичI къуртал дурну дур строительствалул давуртту.
Хучбар Хучбаровлул бусаврийн бувну, Гагариннул цIанийсса аэропорт хъанай бур «Мостоотряд-99» компаниялул бувсса шамилчинсса аэропорт. Цалчин ва компаниялул цIу буккан бувссия АхIмад-Хан Султаннул цIанийсса МахIачкъалаллал аэропорт, хъиривгу вай гьуртту хьуссия «Платов» тIисса Ростовуллал аэропорт буллалисса давурттавух.
Аьрасатнаву Гагариннул цIанийсса аэропорт хъанахъиссар цIуницIакул бувсса кIилчинсса аэропортну. Аэропорт буллалисса давурттавух гьуртту хьуссар Дагъусттаннаясса 1000-нния ливчусса строительтал. Саратовуллал областьрал каялувчитурал лавайсса кьимат бивщуну, бусраврай кьамул дунни «Мостоотряд-99» компаниялул строительтурал дурсса давуртту.
