ДР-лул БакIчи Владимир Васильев хьунаавкьунни гьашину аьралуннал училищартту къуртал бувсса хIаписартуращал. Миннащал увкIунни АьФ-лул Федерал мюхчаншиврул къуллугърал Дазул управлениялул хъунаманал буржру чIумуйну биттур буллали­сса Дмитрий Базакин.

Мунал тIимунийну, Управлениялул аьркинсса давур­тту дуллай бур дунияллул халкьуннал дянивсса терроризмалия ва экстремизмалия, транснационал ва дазул кьатIату нани­сса нигьачIавурттая бурувччуну бикIан. Дагъусттаннал дазул управлениялул дурсса ва дуллалисса давурттал лайкьсса хIасиллу хьун дурну дур, ца­ппара зузалтран дуллуну дур орденну ва медаллу. Шамуннан дуллуну дур Аьрасатнал Виричунал цIа.
-ДР-лул циняв агьалинал цIанияту на зухь бавурув тIий ура хъамал ххирасса Дагъус­ттаннал аьрщарай.

Дагъусттаннай мудангу кьадру-кьиматрай бу­ссар Ватан дуруччайми. 1999 шинал дунияллул халкьуннал дянивсса террорчитурал хIарачат бувну бивкIссар Да­гъусттаннайн бу­ххан, амма миннал хьхьичIун гьаз хьуссар зунттал шяраваллал ялапарчитал, цаймигу кIанттурдая бувкIсса къучагътал. Ми циняв къарши бувккун бивкIссар бандитътурайн. Рес­публикалул МВД-лул тия чулий бур дард-хажалатрал мемориалданул ­аллея, тикку чирчуну дур цала бурж бартбигьлай ливтIусса 1400 милицанал зузалал цIа. Миннал чувшиврийсса давурттайну хIакьину Дагъус­ттаннай цалий дарцIусса паракьатсса тагьар дур, — увкунни республикалул каялувчинал.
Хьунабакьаврий махъ лавхъунни ДР-лул ХIукуматрал Председательнал хъиривчу Рамазан Жяъпаровлулгу.