Гьавалул десантрал аьралуннал байрандалул кьини аьрали бурж дакI марцIну биттур буллай ушиврухлу Ставрополлал крайрал губернаторнал Барчаллагьрал ча­гъар буллунни

ХIажимахIаммадов НурмахIаммад Энгельслул арснан. Кьиблалул федерал округрал «Горный» тIисса десантно-штурмовая бригадалул дивизиялул хъунаманалгу НурмахIаммадлул хъазамрай ларчIунни медаль «За отвагу и мужество».

Зулайхат Тахакьаева
НурмахIаммадлул ппу Энгельс МахIаммадович, полицалул полковник, Ингушнал республикалул виваллил иширттал министр­нал хъиривчу, ххуйну кIулссар ва бусравну уссар Ухссавнил Ккав­кказнал республикарттал агьулданун.

«ЗахIматралли инсан сасангу айсса, бюхттулгу айсса. Чув-адамина кIанттуву унува кьянкьану тарбия уллан аьркинссар,» — учай Энгельслул. Мунияту бухьунссар ванал арснащагу кьуния шанна шинал оьрмулийн ияннин цува зузи­сса кIанттай хьхьичIунсса хху­ттай ацIан бювхъусса.
АцIния ххюра шинаву экстерно школагу къуртал бувну, НурмахIаммад дуклан увххун ур бутталгу хьхьичIунну къуртал бувсса Рязаннайсса Аьрасатнал воздушно-десантный аьралуннал академиялувун. Къуртал бувну бур дуккавривугу, спортравугу хьхьичIунсса ккаккиярттащал.
Цимилагу хьуну ур аьрали гужирдал чемпион, карунний бияврил ва биатлондалул чемпионатирттай. ЦIанакул ва ур аьрали канил биявурттал спортрал мастер.

ДакIнихтуну барча тIий Нур­махIаммадлухь ларайсса награда, хъиннура бюхттулсса наградар­ттал дайдихьуну лякъиннав тIий буру! Буттал ххуллийх гьан­сса, бу­ттал кьяпа гьаз бансса, Къяннал щар лахъа-хъун дансса, лаккучунал цIа бюхттул дансса чув изаннав вия!