Мадара хIал хьунуккар жува хьунакъабавкьуну, на зухь «Лакку билаятрал рухI» группалувусса цIусса хаварду къабувсун.

Цалчинва цалчин бусан ччива группалувуминнал дакIний личIансса хьунабакьаву хьуссар гъинттул Москавлия Ватандалийн биян бувкIсса жула дустуращал – группалул администратортуравасса ца – Тверь шагьрулий ялапар хъанахъисса Ва­ччатусса Наидащал, Хьурияту­сса Гулизардущал, Вихьлиясса ПатIимащал, ЦIуйшатусса Аьйшатлущал. Ва батIавугу цIунилгу хьуссар БанавшачIа – «Балхар» кафелуву.

Ттун кIицI лаган ччива, вай жула хьунабакьавуртту так дялахъру дурну, балай-къавтIавурттайну къуртал къашайшиву. Гьарцагу батIаврий лакрал масъалартту, гьай-гьай, лакку маз буруччаврил­ссагу, миллатрал кказит-журналлу чичаврилссагу гьаз байшиву. Сант дагьну дунура барчаллагь учин ччива мудангу «Илчи» кказитрал подпискалун ка-кумаг байсса жула Банавшахь, ЦIуминалийсса пучрал хъунмур Иринахь, цинявппагу кказит ххираминнахь. Ялагу, жу икьрал дурссар группалуву ла­кку мазрай чичлан ва гъалгъатIун. ТIайлассар, ххуттава буккан багьай. ЧIявусса бур шагьрурдай ялапар хъанахъисса лакку маз ххуйну къакIулсса, хаснува лакку мазрай чичин къакIулсса.
Ци чулийгу, шай-къашай бувну, мигу лакку мазрай учин хIарачат буллан бикIай.
Группалуву 250-ксса инсан бур. Цинявппа гъанну кIул хьун бувару. Амма дакI ххари хъанан дикIай гьарнавусса миллатрахсса, буттал кIанттухсса ччаву чIалай!
Уттигъанну Иваново шагьрулия бувкIсса Хъюллал шярава­сса Наидал бувсунни ва шагьрулий ацIнияхъайсса Хъюллал хозяйство душиву, цанма «Илчи» кказит хъинну ххирашиву.
Ялагу ттун бусан ччива ххари­сса хавар. «Лакку билаятрал рухI» группалуву хьуссар цалчинсса ташу – Бархъаратусса ХIажинал ва Ккурклиятусса Аймисайл. Вайннангу талихI-тирхханну чIа тIий буру.

Хъиндайдихьу хьуннав. Лакку оьрчIал ва душварал дянивсса ташурду гьарза хьуну, лакку кулпат­ру чIяву баннав.
Ва ялагу. Группалуву цинявн­нан ххирасса, дакI хъинсса, аьмал-хIал бавкьусса Ххюлусматусса Исмяил Кунжуев (группалул ванайн полк­рал арс учайссар) жу тIайла укка­рду Аьралуннаву къуллугъ бан. Лайкьну цала буржгу лавхъун, сагъ-саламатну, дакI ххарину нитти-буттачIан зана хьуннав.
КIидачIинна на зущал жула группалул цамургу ххаришиву. Вай гьантрай Дарбантлив, хьхьирил зуманив лахъа-хъунну кIицI дунни Щинай мюхчаншиву дуруччаврил кьини. БайрандалуцIун бавхIуну хьусса спортрал бяст-ччалливу цалчинсса кIану бувгьунни группалувусса Гьамиящатусса Шакиятлул арснал душнил — 6 шин шавайсса Бабатова Аминал.

Жул ххирасса Аминай!
ЧIивисса оьрмулуву ларсъсса хъуннасса вил ххувшаврицIа жу цинявппа ххариссару. Ва багьана хьуну ттиния тихуннай вил оьрмулуву ххувшавуртту ва хьхьичIуннайшивуртту чIяру хьуннав. Вияту вила нитти-бутталгу, гъан-маччаналгу пахрулунсса душ хьуннав.
ТIайлабацIу гьарица дуллалимуниву.
Дустал, на ца анавар буккара зухь ххарисса хаварду бусан. Ччан къабикIай оьккимуния, пашманмуния гъалгъа тIун. Жунма цуксса къаччайнугу, хъанай бур мукунми ишругу жула оьрмулуву.

Чан­сса къавхьунни махъсса шиннардий ишру билаятрал хъун шагьрулий жагьилсса жула оьрчIру оьрмурдацIа хьусса. Уттигъаннугу Москавлив дагъусттанлувтурал ихтиярду дуручлачисса «Лакку билаятрал рухI» фондрал хъунмур Ра­зита Мушидовал тIайла дурккунни Дагъусттаннайн кIира «Груз-200». КIива къушлил ялун дирунни хъуннасса кьурчIишиву.
-Ххирасса ппухърув, нинухърув, уссур­вал, ссурвал, гъан-маччамий! Маитабакьари зула оьрчIру щийн-бунугу тапшур къабувну, мабуккан битару ми зула иттала, аякьалула. Жагьилсса оьрчIру цахунма цивппа бивчуну кьабивтсса чIумал баларду чIявусса хъанай бур, — оьвчаву дуллай бур укунсса иширттащал чIявуну хьунабакьлакьи­сса Разита.
Я Аллагь чув бухьурчагу, гьарица чув Заннал уруччиннав. Ни­тти-буттан оьрчIал дард къакка­кканнав.
Амин.

Андриана Аьбдуллаева