Августрал 8-нний ДГУНХ-лий хьунни республикалул лябу­ккулул проектру бартдигьаврил давурттал ялувбацIаву жяматрайн тапшур даврил хIакъиравусса семинар-батIаву.

Муний гьуртту хьунни ДР-лул Халкьуннал Мажлисрал Председатель Хизри Шихса­эдов, ДР-лул премьер-министр Артем Здунов, ДР-лул БакIчинал ва ХIукуматрал Администрациялул Каялувчи Владимир Иванов ва цаймигу.
Владимир Ивановлул тIи­мунийну, хIакьину шиккун бавтIминнал ххал бигьин аьркинну бур цаппара агьамсса масъалартту, ми ххал бигьин тапшур бувну бур Дагъусттаннал БакIчинал.
Хизри Шихсаэдовлул тIи­мунийну, ихтилат бур щинал дузал баврицIун, ххуллурду бав­рицIун, шагьрурдал къулайшивуртту даврицIун дархIусса проектирдая. Республикалул БакIчи Владимир Васильевлул ккаккан бувну бур ми проектру дузрайн дуккан дуваншиврул республикалул бюджетравату 2,5 млрд. къуруширттал личIи дуван ва 1 млрд. къуруш ялун ххи дуван федерал бюджетравату. ХьхьичIра миксса арцу тачIав къаитадаркьуссар.

Хизри Шихсаэдовлул баян бунни шиккун бавтIсса цинявннан аьркинну бушиву хъана­хъисса иширттавух чялишну хIала-гьуртту хьун. «Ми цинярда давурттал жаваблувшиву дагьлагьиссар муниципал сакиншиннардал бакIчитурайн ва мурадлувсса министерстварттал ва идарарттал каялувчитурайн,» — увкунни ихтилатчинал.
Региондалул ХIукуматрал Председатель Артем Здуновлул бувсунни Дагъусттаннай дузрайн дуккан дуллалисса цаппара национал проектру хъана­хъишиву щалва Аьрасатнал лябуккулул гужну. «Федерал центрданул жуйнна вихшала дурну, итадакьлай бур чIярусса арцу районнайгу, шагьрурдайгу, цаппара щархъавугу агьалинал оьр­мурду хъин чулинмай ба­ххана баншиврул», — увкунни мунал. Премьер-министрнал бувсунни цими шяравун щин дуцин аьркинссарив, цуми шагьрурдай къулайшивуртту дузал дуван аьркинссарив ва цуми районнай хху­л­лурду бакьин буван буссарив.
БатIаврий ихтилатру бунни ДР-лул БакIчинал ва ХIуку­матрал Администрациялул Каялувчи Владимир Ивановлул ва цайминналгу.

ХIадур бувссар
ХI. Аьдиловлул