Дагъусттаннай, инсантал ялапар къахъанахъисса кIанттурдай, хьунни Республикалийсса Росгвардиялул Управлениялул авиа­циялул хасъсса тренировкартту.

Летчиктал тамансса гьант­рай буссия инсантал бакъа­сса кIанттурдай занакьулушиву дуллай, цалчинсса кумагру бан , инсантал бусса кIанттурду кIул бан ва пиротехника ишла дан лахьлай.
Му бакъассагу, Росгвардиялул летчиктал бивкIссар цIу лахъан дан, щин, дукия лякъин ва экстремал тагьарданий ялапар хьунсса шартIру лахьлай.
Росгвардиялул Управлениялул авиациялул хъунама, полициялул подполковник Надим ХIашимовлул бувсунни тренировкартту даврил мурадрая.

— Инсантал бакъасса кIан­ттурдай занакьулу хьун ла­хьхьаву – му Росгвардиялул авиациялул зузалтрал агьамсса ца давур. Левххун нанисса чIумал, летчикнан иш багьайссар ччимур чIумал самолет кьаритансса, багьайссар зунттал кIанттайн, хьхьирийх ва кьирийх леххан. Мунияту хIадурну ва кIулну бикIан аьркинссар иш багьсса кIанттурдай мюхчаншиву дуру­ччин. Укунсса тренировкар­тту дайссар жул зузалтрал шинай кIийлла – гъинттул ва кIинттул. ХIакьинусса кьини, кьянкьану учин бюхъанссар жул хьхьичI бивхьусса масъалартту бартбигьин хIадурну буссар куну, — увкунни Надим ХIашимовлул.