АьвдурахIимлул цала буттаясса дакIнийн бичавуртту хьхьичIрагу чанну-ххину рирщуну дуссия «ЦIубарз» журналданий. Дунугу, жула хъунасса диний­сса ишккаккул оьрмулул тарихрал агьамсса бутIа хIисаврай,

аьл­тту дуллай буру цал уттигу. Вай дакIнийн бичавурттал хъиривсса махъгу, лаккунайнсса таржумагу Курзи Къажлаевалли.

---

Ттул буттал бурхIайхсса нясав, бусалдарах вичIи диширчан, мукьилчинма халипа Аьлил­лул арс ХIусайннуяту нанисса дур. Га цувагу увну ур МахIаммад-идавсил душнил ПатIиматлул. ПатIиматлун увну ивкIсса арсурвавран – ХIасаннул ва ХIусайннул тухумирттан дуллуну диркIссар Сейидитурал цIа. Бусаларттайн бувну, ХIусайннуя бивзсса ирсирал арамтал Дагъусттаннайн бувкIун бур мяйлкусса ттуршукулий, халипа Муслимлул заманнай.

Гания шинмай, Дагъусттан оьрус­нал цала кIунттихьхьун ласуннин, жул тухумран дяъвирдаву давлалуя дирирсса хъуслия ххюва бутIул ца бутIа булайссия. Шамиллул заманнай жул тухумрая­сса 72 инсаннан гай хъуслия бутIа бай­ссия. Тара чIумалла ттул бу­ттал Жамалуттиннул цIа, хъуна­сса аьлимчу хIисаврай, бусурманнаву хъинну ашкарану ва сийлий дуссия.

[pullquote]Инсаннал ххуй-ххуйми тIул-тIабиаьтру
оьттувухра дучIайсса дур.[/pullquote]

Цува жагьилсса чIумал ппу, элму лахьлай, щалагу Ккавкказуллал бусурманнавух увккун ур. Да­гъусттанналми мазру хIисав къабувну, мунан кIула аьраб маз, парс маз, турк маз ва татар маз.
Жамалуттин Аслан-ханначIа катибну (маслихIат-насихIатчину) зий ивкIун ур. Та чIумал Аслан-ханнал мунан дуллуну дия шанна Кураллал шяраваллиясса дишала. Му аваданшивугу, ханначIасса га ххаллилсса къуллугъгу цала дакIнил кьамул къабуллай, гьарзатгу кьадиртун, лавгун ия тIарикьатрал (бусурман диндалул ца къяртта) щайх МахIаммад ЯрагъиначIан, тIарикьатрал вяъза кьамул бан.

ТаначIан нани ххуллий ттул бу­ттан хъамалу ацIан багьну бия хъинну мискинсса, дан-дитан дакъа­сса, амма аьчухсса адиминачIа. Га адиминал мискиншиву ккарксса чIумал, ттул буттал цахьва цала хIайп куну бия цува рязину кьадиртсса цалла аваданшиврий.
Га хъамаличунал тIювах щя­ивкIсса чIумал, буттал иттав уруг­лайгу ивкIун, ганал увкуну бия: «Ва-а Жамалуттин! Вила яру ши­ккун бурган бувала!» — куну. Цала ссюрхъирая яларайсса кару лампа тIий лархъсса цIарал ялун дургьуну, мадара хIалгу бувну, яла Жамалуттиннул хьхьичIун дургьуну дур.

Микку, бурчу ча ччу­ччинссия, хIатта канийсса царагу чIара ччеж къархьуну ккаккайхту, ппу махIатталшиврул ссихI ду­ккан къахъанай ливчIун ур. Цайна цува учIайхту, Жамалуттиннул куну бия: «Му ци караматри! Ттул цIагу вин ча кIулли?» — куну. «Ина учIаншиву ттухь МахIаммад-Ярагъинал бувсунни. Танал ттухь увкуна: «ВичIан Жамалуттин учIантIиссар. Ина му кьамулгу увну, вичIава гьантта ити. Гьунттий мунащал ттучIан ухьхьу, муная жула мюталим хьунтIиссар, яла хъунасса щайх ва усттаз хьунтIиссар, щалагу бусурманнал илданийх машгьургу хьунтIиссар. Укунсса кьадар бур Аллагьнал мунан ккаккан бувну», — куну бур ганал.

Гьарца зат Ярагъинал увку­сса куццуй хьугу хьуссар. ЧIал къархьуну Жамалуттиннул цIа машгьур хьуссар Аьрабусттаннаяту Бухарнавун дияннин.
Му мубараксса щайх ушиврул хавар бавсса цалчинма имам ГъазимахIаммад ва Шамил муна­чIан бувкIун, мунал вяъзалух вичIигу дирхьуну, муная дин-тIарикьат кьамул дурссар.
Гьантта, барз лаглагиссаксса Жамалуттиннул сий ялу-ялун бюх­ттул хъанай, муначIан чIявусса халкь занан бивкIссар. Жамалуттиннул сий гьаз хъанай, цаласса яларай дагьлагьаву Аслан-ханнан тIааьн бизлай къабивкIссар. Ца кьини Жамалуттиннул лагма чIявусса халкь лавгсса чIумал, ханнал мунахь куну бур: «Агар инава карамат­рал заллу ухьурчан, кка­ккан дува вила карамат, акъахьурчан на вин оьсса диван банна», — куну.

Му чIумал цала лагма лавгсса халкьуннахь Жамалуттиннул ку­ссар: «Ласияра чIатIригуча, бачияра ттущал!» — куну. Бувцуну гайгу, шагьрулул парабакIурду бичай­сса кIанттай аглангу хьуну, мукьвагу чулухух ххаругу бувккун, куну бур: «Вана ва кIанттай ду­ккияра мукьмурцIусса, шанна аьрщундалул куртIсса хъунтIа. Зун гиву лякъинтIиссар 16 шинавусса душнил жаназа. Га цимицIалагу шинал хьхьичIра гьазаватрай бивкIусса душри. Га буссар, хIакьину бив­кIусса кунма, яхьуну. Ганил хъазамравугу чIатIаракIрал дурсса щавул аьш дикIантIиссар», — куну.
Жамалуттиннул тIисса куртI­шиврийн бияйхту, мяйжаннугу мунал тIисса душ лявкъуну бур, цийхва кавусса суругума сагъну яхьуну. Му карамат цанна ххал хьувкун, ханнал Жамалуттин цалсса паракьатну ивтссар.
Га карамат хIисав хьусса халкь гания махъ буттачIан хъиннува гьарзану букIлан бивкIссар.
Мукунсса сий Жамалуттиннул гьаз шаврия нигьа увсъсса ханнан ганан макру бансса кьаст хьуну дур. Хан яла-яла нигьа увсун ивкIун ур, халкьуннал цува укьан увну, Жамалуттин итанссар тIий цала ялув. Кьаст хьуну дур, шавай учIан увну, махъачIил цала нукартурахь ивчIан ансса.
ХьхьичI Жамалуттин, хъирив нукартал най, ханнал къат­рал хьулухун ивсса чIумал, цалла урчIамур кагу цала бакIраяр лахъну гьаз дурну, буттал сситтуй куну бур: «Ттуяту вин ци ччай дур? На паракьатну итаннавкьай, къаитаннав?» — куну.
Ларай гьаз дурсса Жамалу­ттиннул ххювагу кIиссураяту цIарал ламарду най, ганал хъачIун­ттайгу хъунмасса аждагъа ххал хьуну бур ханнан. Му караматрал ццах учин увсса Аслан-ханнаща Жамалу­ттин ивчIара тIисса ишан дан къархьуну дур, гагу цала шавай зана хьуну ур.

Ва иш хьусса цинма баяйхту, ханнал кулпат Уммукусум-бика Жамалуттиннухь цила лас багъишла ува учин лавгун бур, ашрапир­ттал бувцIусса шанма кисагу лавсун. Жамалуттиннул ганища кисри кьамул бувну бур. Гайгу гиккува цала мюталимтурайх бавчIуну бур.
Лавмартсса ханнал махъгу-хьхьичIгу цува къаитайшиву бувчIусса Жамалуттин, Гъумучигу кьавабивтун, ЦIахъарав ивзун ур. (Та чIумал ЦIахъар Гъумучиял ханлугъравун бухлай къабивкIун бур).
Жамалуттин ЦIахъарав ивзун цаппара хIаллава байбивхьуссар тархъаншиврул цIанийсса зунттал халкьуннал гъазават, цувгу зувиннияхъайсса шиннардий, бацIаву дакъа, лахъи лавгсса.
Та чIумал Шамиллухьхьун ясирну багьсса гуржиял кIиниязтурал – Чавчавадзел ва Арбелианил кулпат­ру тархъан баврил хIакъиравусса машварартту гьаз хьусса чIумал, ми мурахас баврил ишираву Жамалуттиннул хъуннасса хIала-гьурттушиву дурссар. ПаччахIнал хIукуматрал Шамиллул хьхьичI масъала бивхьуну бивкIссар, агана ми кIиниязтурал хъами итабакьирчан, цала арс Жамалуттингу, ца­ппара ясирсса мюридталгу итабавкьуну, ялунгу 400 азарда къуруш дулунну тIисса.

Гай хъами ясир бан гьуртту хьусса мюридтал тIалав дуллай бивкIссар ца миллион арцул, мигу цайхра дачIинсса къаст диркIссар.
Му ишираву Шамил кIихIу­ллану ливчIун ивкIссар. Ца чулуха ганан ччай бивкIссар цала арс паччахIнал ясиршивруща ххассал ан, гамур чулухагу мюридтурал гьаз бувсса масъалалунгу цикIуй бан бюхълай къаивкIссар.
Му захIматсса масъалалул хIакъираву Шамиллул ва мюридтурал маслихIатчи хьуссар Жамалу­ттин. Ца нюжмар кьини циняв мюридтал бавтIсса мажлисрай, Жамалуттиннул увкуссар: «Мюридтал, зу буру щаллусса миллиондалия гъалгъа тIий. Зун кIуллив миллион циксса арцурив? Урив зуву миксса арцу дуккин бю­хъайсса инсан? Яртал, Чавчавадзел ва Арбелианил миксса арцу ча дуккантIиссар! Зуния миннал ужагъру хъямала бунни. ЦIанасса чIумал ми хъару гъаргъсса лачинтру кунма ливчIун бур! Зун дуллалисса 40 азарда къурушгу, ясирдануща итаакьлакьи­сса имамнал арсгу — му паччахIнан кIиниязтурай цIими хъанай тIири. Зу му даврин инкар буллай буру. Яртал, зун зула имамнай цIими къашайрив! Зун ччай бакъарив чапуртурал ясирдануща имамнал арс ххассал ан?!» — куну.

Жамалуттиннул кусса мукъур­ттил мюридтурайн хъунмасса асар биян бувну: «Жун цикIуйгу аьркин дакъари! Жу жула кулпатирттай мяш къахьунну имамнал арс ясиршивруща ххассал аврил цIаний!» — куссар гайннал.
МукьцIалазарда къурушгу ларсун, Шамиллул арс Жамалуттин ясиршивруща ххассал увссар. Шамиллулгу цачIава ясирсса Чавчавадзел ва Арбелианил кулпатругу тархъан бувссар. МуницIунма оьрус­нахь ясирну бивкIсса ттуршахъул Шамиллул мюридталгу шаппай итабавкьуссар.

…1860-ку шинал, паччахIная ихтияргу ларсун, ттул ппу Туркнавун ивзуна. Туркнал Султаннул му ххуйну кьамулгу увну, мунан оьр­мулухунсса пенсиягу бивхьуссар. Пенсия бивхьуну махъ, Султаннул мунахьхьун ихтияр дуллуна цанна ччисса кIанай мина дишин. Цаппара шиннардий ИстIамлив ялапар хъанайгу ивкIун, лахъи къалавгун, ппу аьпалухьхьун лавгуна. Мунал шама арс Туркнал хIукуматрачIа къуллугъ буллай буссия.
Жамалуттиннул чивчу­сса луттирдаву яла лаваймур захIматну ккаллиссар «Адабул Марзият». Му лу ттул уссу АьвдурахIманнул оьрус мазрайнгу таржума бувну буссар.

Бусанну чан-кьансса Жамалу­ттиннул чIанма-чIивимур душ Шуаьнатлул ирсирая. Та чIумал Гъумук ивкIун ур хъинну авурсса, итххявхсса жагьил, Аминта тIисса. Га оьрчIсса чIумал ханнал аьскарнал Гуржисттанная ясирну увцуну ивкIун ур. Бусурман дингу кьамул дурну, дин-чакгу дайсса Аминтан цала нину-ппу дакIний бивкIун бакъар. Бусласаврийн бувну, га ивкIун ур Гуржиял авадансса кулпатраясса. Ганан цува чассарив, нину-ппу царив кIулну бивкIун бакъар. Лархьхьуну диркIун дур заргалшиву, кьалан битаву. Суратру дайсса диркIун дур. Га авурну лаххайсса, щищал-дунугу дусшиву къадайсса, цала цува увгьусса жагьил ивкIун ур. ЛичIлулсса Аминта Щайх-ЖамалуттиннучIан ухху-укку шайсса ивкIун ур. Жамалуттиннул чивчусса луттиран мужаллатгума дурну диркIун дур.

Кьинирдал ца кьини Щайх-Жамалуттиннул яла ххуймур, буттан яла ххирамур Шуаьнат АминтачIан ливхъун бур. Гава хьхьуну Щайх-Жамалуттингу угьлищал ивзун, ЦIахъарав лавгун ур.
Аминтащал Шуаьнатлул талихIрайсса оьрму бувтун бур. Га ивкIун ур ххишала акъа цала кулпатрай аякьасса, Гъумучиял уздантурал кунма, цала кулпат, оьрчIру ябуллалисса адимина. Оьр­мулул иширттаву ссаву ци буссарив къакIулссар, чай учалалул. Аминтаяту ва Шуаьнатлуяту бивзун бур шанма душгу, шама арсгу. Аминталгу ганал арсурвавралгу Гъумук дурсса къатрал, учин бю­хъанссар, махIларду бувгьуну бур куну. Аминтал ва Шуаьнатлул ца душ буллуну бур Къапихъан. Къапихъал тухумраву гания бивзун бур цIанихсса ххуй-ххуйсса инсантал. Гай бур лакраву бур учинсса агьлу. Так ца цIа рищунна дунияллийхва машгьурсса — Апанни Къапиевлул. Апанни Шуаьнатлул душнил арс Мансурдул арсри.
Вамур душ Аьвдухъан буллуну бивкIун бур.
Ххуйсса инсантал бур гания бивзмигу.
Шамилчинмур душ Къажла­хъал Давудлун буллуну бивкIун бур. Ххуй Рукьижат – цIанихсса аькьлулулгу, ххуйшиврулгу заллу. Мунияту бивзссар цIанихсса профессор Къажлаев МахIаммад-хангу, Юсуп-хIажи ва Загьидигу, Нажмуттин ва Давудгу, цIанихсса музыкант Мурадгу, художник МахIаммадгу.
Шуаьнатлул ва Аминтал арсурваврал никирайхссар щалагу дунияллийх цIа дурксса парашютист дунияллул рекордсмен Наби Аминтаев, цIанихсса революционер-чекист Ибрагьин Аминтаев, Гьарун Аминтаев.
Инсаннал ххуй-ххуйми тIул-тIабиаьтру оьттувухра дучIайсса дур.