[dropcap]И[/dropcap]юль зурул 10-нний республикалул БакIчи Владимир Васильев хьунаавкьуна Аьрасатнал дуклаки оьрчIал олимпиадарттай, жагьилсса хъиривбизултрал Аьрасатнал элмийсса,

«БучIантIимунийнсса ша» тIисса форумрай ва студентътурал Аьра­сатнал олимпиадарттай ххув хьуминнащал.

П. Рамазанова
Республикалул хъунама­начIан оьвкуминнавух ия МахIачкъала шагьрулул №8 лицейрал 10 классрал дуклаки оьрчI, 1-мур ЦIувкIратусса Шамиллул арс МахIаммад СантIуевгу. Ду­ккавриву ва гьармуниву итххявхсса СантIухъал агьулданияту­сса МахIаммадгу чIивину унива дуккаврил бюхъу-хъит бусса, итххявхсса оьрчI хIисаврай, машгьур хьуну ур цува дуклакисса школалий.

---

Сентябрь зуруй Абу-Дабилий хьунтIисса Европанал Союзрал жагьил­сса аьлимтурал соревнованиярттайгу гьуртту хьун оьвкуну бур СантIуев МахIаммадлуйн.

---

Ва Аьрасатнал дуклаки оьрчIал физикалул олимпиадалул муниципал ятIапрал призергу, Аьрасатнал жагьилтурансса, «БучIантIимунийнсса ша» тIисса элмийсса социал программалул лауреатгу ур. МахIаммад респуб­ликалул «ЧIаваминнал творчество» тIисса элмийсса конференциялийгу физикалул секциялий дипломран лайкь хьуну ур. Укунсса дипломирттан лайкь хьусса чIава аьлимтал вузирдавун гъирарай кьамул буллай бур. МахIаммадлуйнгу уттива дуклан оьвкуну бур Москавлив­сса Н. Э. Бауманнул цIанийсса МГТУ- лувун. МахIаммадлул ххал дигьлагьисса тема «Низкочастотная магнитная гипертермия» ттизаманнул медициналунгу агьамшиву ду­сса, захIматсса цIуцIавуртту хъин дуллансса чаран хIисаврайсса тема дур.

МахIаммад СантIуев ур цанна физикалул дарсругу, элмугу ххира шаву лицейрал педагог , лараймур категориялул учитель ХIажибалаева Гульбагьар ХIусайновнал ва физика-математикалул элмурдал кандидат Адлер Гудреттинович ХIамзатовлул биялар тIий. «На ттула насихIатчитурайн дакI­нихтуну барчаллагьрай ура. Вай ттущалва укун гъи­ра­рай зий къабивкIссания, хьхьи­чIунминнавух нагу къа­и­­кIан­тIиссияв»,- тIий ур МахIаммад.
Шиннардих къаурувгун, аькьлулул виувцIусса, хьхьичIун урувгсса, ххаллил акъасса чIава­жагьил ур МахIаммад, Сан­тIухъал агьулданул цIа адаврай дуручлачисса.

Сентябрь зуруй Абу-Дабилий хьунтIисса Европанал Союзрал жагьилсса аьлимтурал соревнованиярттайгу гьуртту хьун оьвкуну бур МахIаммадлуйн. ЧIа учинну жула чIава аьлимчунан цIу- цIусса ххувшавуртту ва хьхьичIуншивуртту.