Хъиншивуртту, аваданшиву уртту, гьай-гьай, цал жучIара ччан дикIай. Амма инсантурал хасиятирттал хъирив лаян, гай кIул дан къахъанахъисса ишру оьрмулуву гьарца чIумал янилун багьлан бикIай.
На зухь, ттула макьалартту дуккултрахь тIайланма учин ччай ура, ттун жула зунттавусса Лакку билаятрай дахханашивуртту хъанай ва «тIутIайх» бичлай ччан бикIай. Амма жунма ччимур хъанайрив къабикIай. Циваннивав, ци багьана хъанайривав?
Уттигъанну на ттула цIурихьулун аьркинсса хIурунис ларсъссия Ваччавсса Увайсов Мамацайл ттучандалия. ЦIуллу аннав ина, Мамацай, муштаритал аьркинлугърал щаллу буллай уну тIий. Инара ттун цалчин яла аьркинма инсан. Амма на гай нис дуркIсса кIану кIул шайхту, ххаригу хьунав, хъирив пикрирдавунгу лавгунав. Нис дия Ккуллал райондалийн Къабардин-Баркьарнал Нальчик шагьрулия дуркIун. Тихава бучIай Лаккуйн лухIими иникIмалуя бувсса хъиннува нахIусса буханкарттугу. ЦIуллу баннав, зу чIаххул.
Оьрус нувщи Азирбижаннава, къур Израилнава, нагь-нис Нальчикрая, ахъулсса часса дуссариврагу къакIулли. Ттун ккарккуна нюжмардий цал Вихьлив бикIайсса базаллуву лухIи хъюрув дахлай. Явара вай лухIи хъюруврал хъун ватанну хъанахъиссар цурда Вихьуллал шяравалу. Иширах бургарча, Ккуллал райондалий шяраваллил хозяйствалул давуртту цайнура цирда нанисса кунна дур. Вай кIура дарну дур таксса инсантурал ЛПХ-лийн. На цакьнивагу чивчуссия, Ккуллал райондалул дякIанттуну хъанахъисса Ваччав яттил, гъаттарал дикI даххайсса кIану бакъашиву. БучIияхха цу-унугу ца ятту-гъаттара ябуллалисса инсан буржлув уван бюхълай бакъахьурча, тавакъю бувну, цумур-бунугу ца ттучандалийн даххансса дикI ларсун улухьхьу учин. Явара, муданма зузисса базаргур райондалул шяраву бакъасса.
На ттула макьаларттаву кIицI бара инсаннан лякьлулссаннущал дакIнилмургу тIалавшинна архIал дузал дуван багьлай бикIайшиврия. Вай ца ххуллул кIира зума дур — ца ххуйну зуншиврул гамургу аьркинсса. Укунсса иширттайн учай ххай ура «сервис» куну.
Бюхъай на ттула макьалалуву гьаз буллалисса ишру щин-бунугу «мюршсса» ишруну чIалай бикIан. Амма мюрщисса иширтталлихха хъуними ишругу зузи байсса.
