[dropcap]И[/dropcap]юльданул 24-нний хьунни ДР-лул БакIчиначIасса Инвестициярттал тагьар ххуй-хъин даврил советрал батIаву, муний каялувшиву дуллай ия региондалул каялувчи Владимир Васильев.

БатIаврий ххал бивгьунни «ФерЭльГам» ООО инвестпроект­ран тургру къадурнура аьрщарал участок дулаврил хIакъиравусса масъала.
Микку махъ лахълай, Владимир Васильевлул дакIнийн бувтунни Советрал хьхьичIмур батIаврийгу ххал диргьуну диркIшиву 2 инвестпроект – Каспийскалий­сса ООО «Ириб» ва ООО «Агромир». «Ми проектирдан кка­ккан дурссар налогирттал чулуха­сса хIаллихшинну, му даврил ялув бацIавугу дуллантIиссар, Дагъус­ттаннай бюхъайссаксса чIявусса бизнесментурал дузрайн дуккан дулланшиврул цалла амбициоз­сса планну, миннуйну жулла респуб­ликалул ялун чIалачIисса каширду ххи дулланшиврул», — увкунни Владимир Васильевлул.

Мунал тIимунийну, Советрал арцуйну кумаг буллантIиссар инженер ва социал инфраструктуралул объектру буллан Дагъус­ттаннал инвестициярттал каширду (потенциал) дузал дуван хIарачат буллалисса ишбажаранчитуран.

Ххал бигьлагьисса масъалалул хIакъираву ихтилат бунни мукунма ДР-лул Ишбажаранчишиврул ва инвестициярттал агентствалул каялувчи ХIажи ХIасановлул. Мунал бувсунни хIакьину Советрай ххал дигьлагьишиву ттизаманнул теплицарттал комплексрал инвестициярттал проект. Микку щалагу шинал мутталий бугьлантIий бур нисварти. Проектрал сиптачигу хъанай бур ООО «ФерЭльГам». Проектрал багьа бур 1 млрд. ва 370 млн. къуруш.

«Жува аьркинссар мукун­сса проектирдацIун кабакьу буллан, цанчирча му хъинну агьамсса давур», — увкунни Владимир Васильевлул, батIаврил хIасиллу дуллай.