Хъинну хъунмасса хIаллай цаннияр ца хьхьичIунсса чиновникнал къуллугъру бартбигьлай ивкIсса инсаннал чичрурду ккалаккисса чIумал,
ттула дакIнийгу, бакIравугу хьхьичIва-хьхьичI загьир хьусса пикрину хьунни укунсса пикри: цумари ва инсаннаву Заннал аьш рирщума – чиновникривкьай ягу чичурив? Ттухьва цIуххайсса ххуллий, мукунссану ур кIилчинма.
Мунил мяйжаншиврийн вих хьунгу чIявусса хIуччардах луглан багьлай бакъар. Ми бур ялун ливчуну най ванал канила дурксса чичрурдал сайки гьарца ххуттава, мукъува. Мисалдаран буцинну цала арс ХIадислун шанна шин хъанахъисса хьхьуну Аьвдуллагь ХIажиевлул дурну диркIсса чичрурдавасса анжагъ ца парча (арс увсса кьинилия шинай ванал нани бувну ивкIун ур дневник). Ва парчагу буцинну цуппа чивчуну бивкIсса куццуй, оьрус мазрайва:
«Только что проводили гостей с торжества, посвященного трехлетию Гадиса. Вечер прошел чудесно. На вопрос «Сколько тебе лет?» юбиляр утвердительно отвечал: «Мне три года». И в интонации чувствуется гордость и он вправе гордиться. На вечере блистал остроумием Расул Гамзатов.Гадис на вершине блаженства – ему дядя Миллатулла подарил машину-самосвал. Он кладет его рядом с подушкой, не желая даже расставаться ночью. А на упрек матери отвечает: «Мамочка, он же чистый…» А дядя Володя подарил комбинированный велосипед. Вот-то радость!
Моя дорогуша – живи много лет счастливо. Да исполнятся пожелания гостей, бог в помощь. Увижу ли я Надежду своей жизни в день его свадьбы? Как я люблю тебя, мое несравненное произведение, счастье мое, жизнь моя, надежда и чаяние, чудесный мой. Слова не могут выразить мои чувства. Даже благоухание цветов, прелесть солнца, успокоительная луна, шептание влюбленных – серые краски, тускнеющие, когда думаю о тебе, мой дорогой, мой дорогущий сын – Гадис, носящий имя отца. Поцеловал бы тебя, ты уже спишь. Расти, цвети – и будь здоров. Сын, сынок, сынуля и еще раз Сын…»
27. 08. 56 г. 23 часа
ПасихIсса литературалувугума ттун ттунна ттинин бакIрайн къадагьссар «успокоительная луна» тIисса, цал архIал инсаннал хьхьичI кIира сурат дацIан дуллалисса образрал калима – хьхьунил чIалачIингу, инсаннал дакIнил хIалгу.
Шиккува хIисавравун къалавсун кьабитан къахъанахъисса бур ца цамур затгу. Жунма, хаснува зунттал кIанттай хъуни хьусса инсантуран, ххуйну кIулссар буттал ва арснал дянивсса ччаву, цуксса кIа чIирисса духьурчагу, хъунмурчIин ялун личин къаритлан дикIайсса душиву, манзилданий ядайсса диркIшиву, хIатта арс чIивисса чIумалгума. Му субстанциялулгу дуссар цилла ца бюхттулсса мяъна. Шикку муния лахъину гъалгъа къабулланну.
Амма паччахIлугърал лагрулийсса, гай яла бунияласса, кьянкьа-кьурчIисса хасиятрацIун бавхIуну бикIан багьлагьисса къуллугъирттай зузисса инсаннал укун ттюнгъасса, иттав макь дучIан дуллалисса мукъурттий арснахсса ччаву аьлтту даву тамаша къабизансса зат бакъар. Аьлтту даву – му ца иш, амма, улукьай, цала ичIуваминнах уруглансса чIунгума ча кьукьин хъиннивав тIий ялапар хъанахъисса инсан-бутта, арс увсса кьинилия айивхьуну, ганан шанна шин хьуннин нани бувну ивкIун ур ганан хас бувсса дневник – тазкират. Ва ишрив тIурчан, зияратран къабишинсса бакъар.
Гьашину, октябрь зурул 4-нний, ХIадислул арс ХIажиев Аьвдуллагь ниттил увну хъанахъиссар 100 шин. Му хъуннасса ва агьамсса даталуцIунгу бавхIуну, жун пикри хьунни, ванал чивчуну бивкIсса «Биллаяти» тIисса кьиссалувасса цаппара парчри язи бувгьуну, «Илчилийгу» бищун. Литературалул укунсса произведение Аьвдуллагь ХIажиевлул чивчуну бивкIшиву кIулссагума жула дянив хIакьину хъинну чансса бакъа бакъасса ххай буру. Ванийн цала авторнал кьисса кунугу бакъарча, этюдру куну бур. Цала цIанин кIанттайгу бивхьуну бур литературалул псевдоним – Щавхала Шавкул. Вай этюдирттавусса персонажталгу, цивппа ишругу, ми хъанахъисса кIанттурдугу хъунмурчIин цIа-бакI дусса, оьрмулува лавсъсса бушиву чIалай бур, бувчIлай бур. Жул пикрилий, «Биллаятилул» жанр ккалли бан бучIир публицистикалул ва художествалул дянивсса литературалул журалун.
Басмалийгу бивщуну, дунияллийн бувкмур кьисса бур чивчуну оьрус мазрай. ЦIанил лув куну бур «Подстрочный перевод с лакского автора» куну. Амма, цуксса хIайпнугу, ниттил мазраймур вариант, оригинал, яхьуну бакъар. Ттуршилвагу хIайп: цуксса авадансса, цуксса кьимат ххисса лакку мазрал дуниял, хан хъус къадикIанссия жунна мюнпатиран ишла дансса!
Р. Башаев
