[dropcap]М[/dropcap]яйцIалла шин хьусса пенсионертурал ласаван аьркинссар 100% лахъ бувсса, дазу ккаккан дурсса (фиксированные выплаты) пенсияртту. Муния бувсун бур ДР-лул Пенсиярттал фонд­рал прессалул къуллугърал цалва сайтрай.

Гьашинусса шинал дайдихьулия тIайла хьуну пенсияртту лахъ хьуссар 7,05%, ми хьуссар 5334,2 къуруш. 80 шин хьуминналсса хьун аьркинссар 10 668,4 къуруш. Пенсиярттал хIакъи-хIисав (перерасчет) цIунилгу даншиврул заявление чичин къааьркинссар, ми, лахъгу бувну, булавантIиссар инсаннал 80 шин хьувкун.
1-мур группалул инвалид­туран кIилий ххи бувну була­вантIиссар инвалидшиврул пенсия бишай­сса чIумал.

Ухссавнил зума-къирагърай зий 15 шин дурминнан мукунма 25 шинал страховой стаж бу­сса арамтуннан, ягу 20 шин зий бивкIсса хъаннин 100% лахъ був­сса пенсияртту уттигу лахъ буллалиссар 50%.

Хъунив хьуну, уругалах мюхтажсса инсантуран ккаккан бувну буссар булун уругалансса багьа. Га багьа булайссар, агарда уругала официалну чувчIав зий акъахьурча. Га бюхъайссар икIан ишбажаранчи, адвокат, яни цува заллу­сса даврий зузисса инсан. Уругала икIан къабюхъайссар пенсионер, мунал къаласаван аьркин­ссар зукъазинан булайсса напакьа (пособие).

Пенсионер (80 шин хьу­сса) чувчIав зун къааьркин­ссар. 80 шин хьусса пенсионернах уругайма икIан бюхъайссар угьара­сса инсан, ягу 14 шинавун увхсса оьрчI-бакI.
Уругалансса арцугу дулай­ссар пенсиялущал цачIу, яла пенсионернал ми дулайссар уругалан.