[dropcap]И[/dropcap]юльданул 18-нний ДР-лул БакIчи Владимир Васильевлул дунни кугьна хьу­сса къатрава халкь бизан баврил ва чIявуквартирартту бу­сса къатраву капремонт даврил хIакъиравусса батIаву.

ХьхьичIмахъ лахълай, Владимир Васильевлул бувсунни цаппара ккаккиярттая: «2017 шинал сентябрьданул 1-нин республикалул программарттал лагрулий жува бизан буван аьркинссия 253 къатравасса инсантал – 3257 кулпат. Миккун кка­ккан дурну диркIссар 4 млрд. ва 536 млн. къуруш. Июльданул 17-нин социал наймрал кьутIирду чирчуну дия 2220 кулпатращал. МахIачкъалалив халкь рязину бакъая цIуну бизан бансса райондалия. Дарбантливгу мура тагьар дия. Гьашину жунма аьркинссар кугьна хьусса къатравату халкь бизан баврил программа бакIуйн дуккан дуван».

ДР-лул БакIчинал бувсунни капремонтрал тагьарданул хIакъиравугу. Мунал тIимунийну, капремонтрал региондалул прог­раммалувун 2014-2040 шиннардий бакьин буван лавсун бур 3502 къатта. «2014 шиная 2018 шинайннин бакьин бувну бур 180 къатта, амма мукунсса бущилий бакьин булларча къабюхъанссар программалийсса къатри бакьин буван ккаккан дурсса чIумал. Капремонтрахлусса арцугу цинявннал дуллай ба­къар – анжагъ 48,5% агьалинал дуллуну дур. Му давугу гужлан дуван аьркинни жунна», — увкунни региондалул каялувчинал.

Яла цалчинмур масъалалул хIакъираву махъ лавхъунни ДР-лул строительствалул ва ЖКХ-лул министр Залкип Залкиповлул. Мунал гьартану бувсунни инсантал кугьна хьусса къатрава бизан буван къахъанахъаврил сававрттая.
Мува масъалалул хIакъираву ихтилат бунни МахIачкъалаллал бакIчи Салман Дадаевлул, ЖКХ-лул реформа даврин кумаграл фондрал директорнал хъиривчу Дмитрий Парфеновлул, Дарбантуллал бакIчи Хизри Абакаровлул.
Яла ххал бивгьунни кIил­чинмур масъала. Республикалий капремонт даврил тагьардания гьартану бувсунни Капремонтрал Дагъусттаннал фондрал каялувчи МахIаммад Аьлиевлул.
Масъала ххал бигьаврил хIа­силлу дунни Владимир Васильевлул.