«Аьпалул кIияма»
[dropcap]И[/dropcap]юньдалул 22-нний, Дягъулул ва аьпалул кьини, щалла дунияллий кунма, Каспийскалийгу дакIнийн бивчунни Хъун дяъвилий талай бивкIми, талатаврилмайданнай ва концлагерьдай буттал кIанттухлу оьрмурдацIа хьуми. Дяъвилий щавурду дирну, Каспийскаллал госпиталлай хъин хъанай бивкIун, ахир-мина ва шагьрулул аьрщараву хьуминнал аьпа учин аьрали хIатталлийн бавтIун бия шагьрулул администрациялул ва личIи-личIисса къуллугъирттал каялувчитал, ветерантурал ва цаймигу организациярттал вакилтал, аьралитал, дуклаки оьрчIру.
[dropcap]Щ[/dropcap]алагу Аьрасатнаву дуллалисса «Аьпалул кIияма» («Горсть памяти») тIисса цIанилусса патриот акциялия бувсуна Каспийск шагьрулул аьрали комиссар Геннадий Кьурбановлул.
— Ва кьини, ахттайннай ссят 12 хьуну, Аьрасатнал цинярдагу субъектирдай хьуссар уссушиврийсса гьаттардия аьрщи ласласисса ритуал.
[dropcap]Ц[/dropcap]иняр аьрали аьдатругу щаллу дурну, ми аьрщи диян дувантIиссар Подмосковьелийн, яла, артиллериялул снарядирттал чиллаву (гильзардаву) дирхьуну, АьФ-лул Ярагъуннил гужирдал агьаммур храмрал аьрщараву – «Хъамакъабитулул ххуллу» тIисса тарихрал ва мемориал комплексраву дишинтIиссар, — куну, бувсуна Геннадий Кьурбановлул.
[dropcap]И[/dropcap]хтилатру ялагу бувна шагьрулул администрациялул бакIчинал хъиривчу Людмила Левицкаял, ЦIуссалакрал райондалийсса 1999-ку шиналсса аьрали иширттал гьурттучи Насир Бурчакьовлул, Ветерантурал организациялул председатель Тажуттин ЧIимаевлул. Аьрали оркестрданул рурцуну бия аьрали макьанну. «ЧIава армейцы» тIисса организациялул вакилтал ккалай бия аьрали назмурду.
Акция дайлиртIуна дяъвилий ливтIуминнал аьпалун минутIрайсса пахъ багьаврийну.
ХIадур бувссар
Бадрижамал Аьлиевал
