Июль зурул 1-нний агьали кьамул бунни АьФ-лул ПаччахIлугърал Думалул депутат Аьвдулмажид МахIрамовлул.

Имара Саидова
Буйнакскаллал 4-мур оьрчIал багърал каялувчи Зайнаб Изиева депутатнахь барчаллагь учин бувкIун бия тарбиячитурах дур­сса аякьалухлу. ОьрчIал багъран Аьвдулмажид МахIрамовлул машан ларсун дия игрушкар­тту, дурну дия бахшишру.

Хъунзахъиял райондалия­сса Буцра тIисса шяравасса Каримулла Къарагишиевлул бувсунни депутатнахь МВД-лий зий ивкIсса цала арс 2011 шинал, къуллугърал бурж би­ттур буллай, оьрмулуцIа хьуну ливчIшиву, утти цала канихун багьну бушиву цIуллу-сагъшиврул ссуссукьушиву ду­сса арснал щар ва ххюва оьрчI. Вай цивппагу ялапар хъанай бур лаякъатрай. 2014 шинал Къарагишиевхъал кулпатрал ДР-лул Виваллил иширттал министерствалул къатта-къушлил дузал баврил фондрайн буллуну бур кумаг тIалав баву мурадрайсса аьрза. Му аьрзалул мурад тIурча, хIакьинусса кьинигу щаллу хьуну бакъар. МахIрамовлул ва масъалалул хIакъираву цала кумагчитурайн тапшур бунни, Республикалул Виваллил ишир­ттал министрнайн аьрза чивчуну, хъирив лаяву.
МахIачкъалалий ялапар хъанахъисса 1-мур группалул мушакъатсса Наби Аьбдулов аьрзирай увкIун ия, рецептрай итабакьайсса даруртту къабуллай бур тIий. Депутатнал, гава ссят Республикалул ЦIуллу-сагъшиву дуруччаврил министерствалул аптекардал управлениялул хъунама Хулатдай Магьдиевлуйн оьвкуну, тIалав бунни ва масъала щаллу баву.
Семендер поселокрай ялапар хъанахъисса Акаева Таибат аьрзирай бия цалла къатрал хьхьичIсса кIичIиравун канализация экьинанисса тагьар лахъи ларгун, цивппа хъинну инжит хьуну бушиву буслай. Депутатнал ва масъалалул хIакъираву администрациялул бакIчинайн чагъар чивчуну, тIалав бунни анаварсса мутталий ххуллу низамрайн буцаву.
Ва кьини Аьвдулмажид МахI­рамовлул кьамул унни ли­­чIи-личIисса масъаларттал хIа­къираву увкIсса 11 инсан. ЦачIанма бувкIсса агьалинал масъаларттал хIакъираву ккав­ккунни маслихIатру ва тапшур бунни цала кумагчитурайн ми щаллу баврил ялув бацIаву.