Гьар шинах «Аьрасатнал оьрчIру» тIисса программалул лагрулий Дагъусттаннал Дакьаврил фондрал ахIвал кIюласса кулпатирттаватусса оьрчIру гъинтнил лагерьдай бигьалаган гьан бувай. Июнь зурул 29-нний фондрал делегация бивунни «Терменлик» лагерьданийн. Тикку ур республикалул личIи-личIисса районнаятусса ва шагьрурдаятусса 300 оьрчI.
П. Рамазанова
Хъамал хIурматрай хьунабавкьуна лагерьданул директор Ислам Муртузалиевлул, лагерьданий зузиминнал ва оьрчIал. Дагъусттаннал Дакьаврил фондрал правлениялул председатель Мухтар Даудовлул, цалчинсса смена дайдишаву барча дуллай, кIицI лавгуна бигьалагансса шартIру лагерьдай ххуйну дузал дурну душиву. Аьрасатнал дакьаврил фондрал чулухасса Барчаллагьрал чагъар буллуна Ислам Муртузалиевлухьхьун.
Хъамаллурал дуллуна ссайгъатран ларсмургу — волейболданий буккай ттупру ва къертту, футболданий буккай ттуп, дия нацIу- кьацIугу. Хъамаллуращал бия Дагъусттаннал паччахIлугърал ссихьрал театрданул актерталгу, миннал ккаккан бувсса «Мишкал ччикьри» тIисса спектакль чIава тамашачитуран ххуй бивзуна.
