[dropcap]В[/dropcap]аллагь, хъинну кIихIуллану бивкIра ва макьала чичин компьтерданул хьхьичI щябикIлакIисса чIумал. Инсан ххари анмуния, дакI тирх учинмуния бакъа чичин ччан къабикIайхха. Амма ялагу ттула бакIрайн ласав на ва захIматсса масъала.

Цанчир­ча КЪАБУЧIИССАР хIакьину, жула культура, жула рувхIанийсса ххазина, укуннагу мазращал архIал духлагаврил нигьачIиндаралу дусса чIумал, дакI паракьатну ташвишсса иширттал чIарах буклан. Ттул ихтилат уттигъанну Лакрал театрдануву хьусса “Къалайчитал” пьесалул премьералиятур.
Лагрулул чIивисса бунутIий пьеса, Лакрал театрданул сценалий ччя-ччяни къабишайсса бия.

[dropcap]М[/dropcap]ахъва-махъ дакIний ливчIсса постановка дурссия, аьпа биву, хъунмасса гьунарданул заллу­сса Валерий Эфендиевлул. Цуппагу хъинну дакIний личIансса ку­ццуй. Гьашину Лакрал театрдануву цIунилгу бихьлай бур ва пьеса тIий баяйхту, лакрал культуралий дакI цIуцIими хъинну ххари хьуна. Ххари хьу­ссияв нагу. Хаснува режиссер ПатIимат МахIачева лакку душри, Гьаруннул ссил арснал душри, Москавлия бувкIсса режи­ссерди увкукун. Ххарисса умуд бишин бувнав “Илчилийсса “ Зулайхат Тахакьаевал ганищал дур­сса интервьюралгу.

“Къалайчитал” спектакль байбихьлай бур хъинну архния. ДакIни-мазрай бакъасса Италиянава. Шикку хъанахъимур най бунува лаласун биялну захIмат хъанай бур. Тамашачитал махIаттал хьуну бур. Жува “Къалайчитурайн” бувкIунвагу бурував тIисса кIанайн биллай бур. БувчIлачIиссаксса, Лайла тIисса итальян душ дагъусттан оьрчIах эшкьи хьуну букIлай бур царай соревнованиярттая. Нину-ппу рязину бакъар. Ккавкказ агьлу захIматсса агьлу бушиврия гайннангу хавар бур. Амма махъ-махъ буттал ниттил аьч бай кулпатрахь ттинийн кьюлтIну бивкIмур. Гайннал ттатта ивкIун ур гана га “Къалайчитурава­сса “ АхIмад. Мунияту бухьун­ссар вайннал душгу дагъусттан оьрчIах эшкьи хьуну. Мадара хIаллай най бур сценалий “Италиянавусса” ишру. Яла, ахирдангу, байбихьлай бур цуппа “Къалайчи”.

[dropcap]Л[/dropcap]акрал театрданул артистурай аьй дансса кIану ба­къар. Шайссагу, ххишалассагу хIарачат буллай бур. НахIуну бур. ТIааьнну бур. Хаснува кIицI лаган ччай бур жула мяйжаннугу бюхттулсса даражалул артист Аслан МахIаммадов, АхIмадлул роль дургьусса. “Италиянавуми” иширттавух хIалами артисталгу гьакссагу ххуйри, тIааьнни, ус­ттарди. Так жува цамур пьесалийнъяв бувкIсса. Хъинну пикри бан аьркина, Гьаруннул гьунарданущал цува архIал авцIуссара куну, ,Гьаруннухлу “Къалайчитал” “щаллу” буллалисса инсаннан. Ттинин му даву дан цучIав сикъавсунни, жула машгьурсса драматургтураягума.

[dropcap]Н[/dropcap]а маслихIат бавияв ПатIимат МахIачеван, “Къалайчиталгу” цивппа бивтун, ва цила шикку гьаз дурсса темалий, “италиян” бутIа щаллу ккур­ккисса цилалусса цамур пьесалийн кIура баен бан. Темагу ххуйри, хIакьинусса жула халкь дунияллийх ппив хъанахъисса кьинилуцIунгу даркьусса дур.
Италиянал парчлуву, авладрал кьюлтIсса (кьюлтIсса личIи та циванъя икIан аьркин­сса, кьюкьлайяв, ягу цамур иширайнуяв?) гьанулул ттарцI хьуну ккаккан увну ур “Къалайчитурал” герой АхIмад. Пьесалуву тIурча, ва уссар оьрмулул ах­ттайн танива бивзсса, оьрус мазвагу къакIулсса инсан. Каши-кьудратралгу, укунагу, нюжмардий цал гъилисса ххув бан кьудрат дакъасса инсан, ахирданий гьар думуницIа хъанай ур.

[dropcap]П[/dropcap]ьеса къуртал хъанай бур АхIмад авлия хьуну “Багъдадливсса” ххуллух луглагаврийну. Мунал Лаккуй цукунчIав кьабитан дакIнийн къабагьайсса кулпатгу бур, минагу дур. Ххишалдаран му утти оьттулучугу ур. ЦIусса пьесалул “Итальян” бутIуву тIурча, АхIмад, оьрус щарссагу дурцуну, революциялул чIумал цал Польшанавун, яла Италиянавун лавгун ивкIун ур. Тих биялсса авладрал гьанугу бивзун бур. Гьай-гьайкьай, дунияллий хьу-къашайсса ишру къабикIай. Бур жула халкь, Италиянавун бакъа, тана та Америка- Бразилиянавун лавгссагума. Амма АхIмадлул ахIвал хIисавравун лавсун, му хьун бюхъайсса иш бакъар. Ва ялагу, ва “Италиянал” парчлул пьесалуву мяъна цир, так ца чIун лахъи лаган даву дакъа? Спектакль уттизаманнун тIалавсса лагрулий лахъи буккан бан ччинан, хIалтIухъантурал, къалайчитурал захIматсса, жапа­сса гъурбатрайсса оьрмулун хас бувсса лакрал шаэртурал хъинну бюххансса назмурду ччиссаксса буссар.
БувчIин къашай, циванъяв режиссернал Гьарун Саэдовлул укуннагу лагру чIирисса драмалува га яла даши бизайминнувасса касак букьан бувсса. Вана ва “аьйлулун багьсса” касак:

Илъяс. Ина цIухлай ур ванал.
АхIмад. Ишто нада?
Тилчи. Ахмед Магомед оглы, да?
АхIмад. Да моян будет.
Тилчи. Вот телеграмма. Расписывайтесь в получении.
АхIмад. Татарски можно писать?
Тилчи. Нет, пожалуйста по русски.
АхIмад. Пожалиска моян читай не знай… посмотри. (Камиллухь) Ттул цIа чича ваний.
Тилчи. Айша кто будет? Есть такой?
АхIмад. Айша наш баб будет.
Тилчи. Ишь ты, стерва, как зовется.Так, значит, это самая Айша что ли пишет, что 15 торги.
АхIмад. Тург, знай… знай… Пожалиска сегодня какой будет…
Тилчи. Сегодня 12. Но давай расписку, лопата татарская. Довольно тебе.
АхIмад. Ласи да…

Толерантнайшиву кка­ккан бан? Оьруснан къаччан къабикIан? Жулама оьккину ккаккан къаан? Гьаруннул ми затру къакIулну чивчуну бивкIссарив кIа касак?
Спектакльдануха зузиминнал лакрал ахIвалунних, лавг­муних, бивкIмуних къулагъас чан­сса дуршиву чIалай бур. Лаккуя увкIсса Макьсудлул ссайгъат­равух, масалдаран, дукьра хIан дикIан къабюхъайссия. Лаккуя Аьрасатнавун дукьра хIан къадияйссар. Къалайчитурал ду­ссукъатлул атмосфера сценалий бувагу бакъая.

[dropcap]Я[/dropcap]нналиягу. Та ппурттуву Аьра­сатнал паччахI, ганал уссур­вал, генералтал, язисса арс — чIивитIугума жула чиллу-чухъри ларххун бур. Жула къалайчитурай тIурча жулану жула, оьрусну оьрус да­къасса, саллатIнал лултту гьухъри кунмасса кIяла гьухъри лав­ххун бур. Мува ку­ццуй, “хияллаву” (Гьаруннул пьесалуву хъами бакъассар) бахтти бакъа Макьсудлун ккаклаки­сса “хIурулъэнтругу” (дакIний цала цIа кусса жалин бунува, вай цикссава душрур ванал итта­лух занази бувсса) “Лезгинка”, ягу “Дагестан” ансамбльданул къавтIи душру уттисса яннардал балгусса. Ганал хияллал хьхьичI бацIаймур тIурча лакку янналувур, махъ бакъа, чIалачIи бан аьркинсса.

[dropcap]Ш[/dropcap]ирванинал музыкалий аьй дансса цу уккай­ссар? Амма Надир Хачилаевлул мукъурттийсса балай, цуксса ххуйсса, бюххансса бухьурчагу (ттущава иттав макь дакъа вичIи дишин къашай) шикку махъру бакъасса музыка итабакьирча хъина, цамур тема хIала къадухлан.
ТIайлассар, цIанакул щаллагу дунияллий классикалул произведенияртту, драмар­тту, операр­тту, балетругума режиссертуран ишттахIран ччан бивкIсса журалий буллай бур. УхчIинлавай кIура баен буллай бур. Бувача. Тайннал бувача. Тайннал ишру личIири. Ца кIанттай “новация” духьурча, чIаравва,цамур театр­данул, жард къакуну, бихьлай бур цала классика. Жула му каши дакъар. Театр ца бур. Мунийн бувнугу, жува хъинну му­гъаятну бикIан аьркинну хъиннува авадан бакъасса жула класси­ка жагъала къабан.

Жула театр цимигу бюхттул­сса даражалул режиссертурал канилух бувксса, минная багьа бищун къашайсса дарсру ларсъсса театрди. Шекспирдул трагедиярттайн бияннин­сса классика ларайсса даражалий бивхьуну, тамашачитал хIайран був­сса театрди. ЦIанакул идаралул бакI дургьунугу хасну театрданул культуралул элму дур­ккусса, миллатрал хIурматран лайкьсса инсантал бур. Да­гъусттаннал театрданул зузалт жула театрданул чулухунмай хIурматрай буруглай бур.
ЧIалай бур ПатIимат Ма­хIачева, цила оьрмулул тагьар сававну, лакрал багьу-бизулия, тарихрая, культуралия арх бувц­сса инсан бушиву. Амма чIу­мулгу. захIматралгу гьарзат цила кIанттайн бутантIиссар. Так дуллалисса даву дакIнил цIарал гъили лаган дурсса дикIан аьркинни. Умудгу бишинну, ПатIимат МахIачевал вания тиху­ннайсса давуртту так муна мукунсса дикIанссар тIий.

P.S. На ва макьала я режи­ссернайн къаршину, я щин-бунугу кьурчIи бизан бансса мурадирай къачичав. Так Гьарун Саэдовлун цила чIумал “аьзиз­сса миллатран хъинбала бан” ччай бивкIсса ку­ццуй, ттунгу ттула миллатрал культуралуха зузими, муниха хъинну мугъаятну, хъуннасса къулагъасрай, хIурматрай, эшкьилийнугума зий ччай бур. Ци бунугу щилтагъсса ттуща шикку ливчуну бухьурча, ялтту бучIира.

Махъ бакъа, цIунилгу Гьаруннул пьеса сценалийн буккаву — му щалагу миллатран хасъсса, хъуннасса байранни. Гьай-гьайкьай, ва ппурттухгу залдануву щябивкIсса чIявуми гьаксса рязину, ххарину, барчаллагьрай бия. На кунма оьбивкIми хъинну чансса бакъа бакъая. Ттул махъ щябивкIсса лакку мазрал учительница мукьал бявххун най бия. Макьсуд ивкIлакIисса, Асланнул АхIмад авлия хъанахъи­сса ппурттуву ттулагума яру виримукьал бувцIунни. Муврихха классикалул гьарзатралгу ялтту ххяххайсса гуж.
Мунияту, барча тIий бура лакрахь жула театрданул цIусса премьера. Насияра Лакрал театрданувун чара бакъа. Ххал бара цIуну бивхьусса “Къалайчитал”. Бищара кьимат зува-зувагу.

Качар ХIусайнаева