НицIавкIул
КутIасса справка

НицIавкIуллал шяравалу дуссар (диркIссар) Гъумучату баргълагавал чулийннай шанна-мукьра километ­ралул манзилданий.

1886 шинал Аьрасатнал паччахIлугърал дурну диркIсса жяматирттал ккалданийн бувну НицIавкIуллал шяраву бивкIун бур 60 къатта-пуркIу.
Ва шяравалу сакин хьу­сса кIанттугу, цурда дурну диркIсса архитектуралул диц-куцгу ялугьлагьинаща ябатIин къашайсса кьяйдалийсса дур. Му асар цукунчIав чIиви личIлай бакъар хIатта щар щалла эяллай дарцIуну мукьахгума.
Мунинма лавхьхьуну ва хъун дакъасса шярава чивун бувккун бур цаннаяр ца цIанихсса, гьунар бюхттул­сса инсантал, — Машрикьуллал илданул дянив цIа машгьур­сса аьлимтал, шаэртал.

Маккаллал мизитраву муфтину къуллугъ буллай ивкIун ур Ибрагьим-хIажи тIисса ницIавкIрачу.
Дагъусттаннал ва щалагу Ухссавнил Къапкъазуллал муфти, тарикьатрал шаннагу къяртлул щайх Сайпуллагь-кьади Башларов Къапкъазуллал цинявппагу бусурмантурал чулухату увчIуну ивкIссар Аьрасатнал Учредительный Собраниялул членну. Къазанищуллал шяраву ванал гьа­ттай бувну буссар зиярат.

НицIавкIуллал цамагу арс ХIасан-Шуаьй, куртIну элму кIулсса аьрабист, дарсру дихьлай ивкIссар Дагъусттаннал мадрасарттаву.
Та чIумух бурувгун, мадара ттуршамасса, Гъази-Гъумук цува заллусса хъунмасса ттучангу бусса, ишру нанисса инсанну ивкIун ур НицIавкIратусса Шилла­хъал МахIаммад-хIажи. Мунайн кутIану Шилла учай­сса бивкIун бур. Халкьуннаву ливчIун бур мунаха тава заманнай ляхъан бувсса ца укунсса аьнтIикIасса шаммагума:

Шилла цува къаччива,
Шиллал дарайртту ччива,
Шиллал кIяла ларзулу
КIакIава хIачIлай ччива.
Ванала арс МахIаммад-Саэдгу ивкIун ур цала бу­ттал цIанин лайкьсса, чантI увку­сса чув — аьрабрай хъинну дурккусса аьлим. Совет заманнай, ххюра шин кьуркьуну, гьан увну ивкIун ур ссивирливгу.
Яла махъ МахIаммад-Саэдлул арс Шиллаев ХIажимахIаммад кьура шинал мутталий зий ивкIссар Щурагьиял педучилищалул директорну. Ванан дуллуссар ЗахIматрал ЯтIул Ттугълил орденгу, «РСФСР-данул школалул лайкь хьусса учитель» тIисса цIагу.

Вава агьлу-авладрал дяниватусса ца цамагу вакилнал цIа чирчуну дуссар тарихраву тачIав ликъаххан­сса куццуй – ххишала бакъа гьунар ххисса шаэр-аьраличу Шяпи Башларовлул цIа. Мунайн учайсса бивкIун бур НицIавкIуллал Шяпи куну.

1944-кусса шинал, зун­ттава бизан бувну нанисса чIумал, НицIавкIрав диркIун дур 57 тIюва, яхъанайгу ивкIун ур 231 инсан.
Зувилку шиннардий НицIавкIрав сакин дурсса колхозран цIа диркIун дур «Путь в коммунизм» тIисса. ЦIуссалаккуй салкьи хьуну мукьах, ялатусса хIукмулийн бувну, вайнналмур колхозгу, «Красный Восток» тIисса ДучIинналмур колхозгу цачIун дурну, сакин дурну дур Маленковлул цIанийсса колхоз. Муния махъгу му кIура даен дурну дур «Правда» тIисса цIанийн.
Хъунмасса Буттал кIанттул цIанийсса дяъвилийн НицIавкIуллал шяравату лавгун ур 27 жагьил, зана хьуну ур минная анжагъ 7.
ХIакьинусса кьини НицIавкIуллал жямат кIанттул хьуну буссар Новостройрай, цайминнащалгу цачIуну, ДучIиннал шяраву.