[dropcap]Ч[/dropcap]Iивиний на эшкьи хьуну бикIайссияв гуржиял ажарттух. Сурхай-Саба Орбелианил баснялул гьанулий режи­ссер Мераб Сералидзел ларсъсса «Лесной квартет» тIисса мультфильмравасса хъинну авурсса, ляличIину балайгу тIисса ажари.

---

Тичча нанисса духьун­ссар гуржиял балайрдахсса ттул ччавугу. Му ччаву шинну наниссаксса ялу-ялун ягин дуллай духьунссар тайннал макьанну Хъусращиял балайрдаха хъинну лархьхьусса душиврулгу.

[dropcap]М[/dropcap]укунссава асар биян бю­хъайссар Гамлет Гонашвилил, Лела Татараидзел, Илья Закаидзел балайрду бавсса цума-цаннайнгу.
Лакрал такьварду асар шай ттун кахетиянал халкьуннал балайрдавугу. Ца базилух жула цIанихсса балайчи Арслан Шагьмардановлул бувсуна, 90-ку шиннардий Голландиянаву фестивальданий цала увкусса «Жан Ясай» тIисса балайлуха хъинну лавхьхьусса балай тара фестивальданий кахетиянава­сса фольклорданул ансамбльданул балайчитуралгу увкуна тIий.
Ттунма яла хьхьичIунми магьирлугърал ишккаккулт ва балайчиталгу хасну гуржиялсса бур: композитор Реваз Лагидзе, хIакьинугу союзрал республикарттал инсантурал зумув­сса «Тблисо» балайлул автор; «оьрус­нал романсирдал паччахI» Нани Брегвадзе; Тамара Гвердцители, Валерий Меладзе.
«Новости-Грузия» порталданул сияхI­райн бувну, ларгсса шинал Гуржиянавун бувкIун бур 8,7 миллиондалийн бивсса инсантал. Вайннава 4,8 миллион бур туристал. 2017 шинах бурувгун, 9,8 процентрал гьарзасса. 30

[dropcap]Я[/dropcap]ла чIявусса туристал бувкIун бур Азирбижаннава – миллион ва мукьттуршлий кьуния мукьазаллий ряхттуршлий ацIа; Аьрасатнава — 1 миллион ва мукьттуршлий мукьазаллий арулттуршлий ххюцIаллий арула инсан; Армяннава – миллион ва кIиттуршлий ряхцIаллий мяйя инсан; Турциянава миллион ва урчIцIаллий мяйя инсан. ЛивчIми туристал бур Ираннава, Украиннава, Израилнава, Польшанава, Германнава, Беларуснава.

Тайннал культуралул, багьу-бизулул дакI ясир дансса савав цамургу хьухьунссар совет заманнай хъинну хьхьичIунсса ва бюхттулсса даражалий диркIсса гуржиял кинематография. Караматну ккаккан бувну бур Георгий Дагениял, Отар Иосилианил, Эльдар ва Георгий Шангелайлхъал кинордаву Гуржиял билаят – мубараксса кIанттурду, хьхьичIавасса ахIрамру, аслий­сса архитектура, караматсса зунттал тIабиаьт, аькьилсса ва аьчухсса халкь, мяъна куртIсса хъярчру, авадансса ссупра, цIа ларгсса чяхир.
Гьарца Ххувшаврил кьини ссавур дакъа ялугьлай буссару жува Резо Чхеидзел «Отец солдата» кинораву жуна ххира хьусса «солдатнал ппу» Георгий Махарашвили экраннайн укка­ннин. Буруглагиссаксса нахIу лачIлачIисса «Мимино» (режи­ссер Георгий Данелия) тIурча ккалли хьуну дур Гуржиял билаятрал бакIрал чагъарданун.
Гуржиял культура ххирашиву чIалай, Боржоми, Бакуриани курортирдайн лаглай, тихалу кIулсса ттул ппу, аьпабиву, икIайссия, школа хьхьичIунну къуртал барча, на Ттуплисливгу, тарихийсса кIанттурдайнгу буцинна тIий. Амма на школа къуртал баннин, Союзрал респуб­ликарттугу батIул хьуну, арардугу руцари хьуна. Ишру цила кIанттайн багьаннингу ларгуна диялсса чIун. Бюхъайвав на ялагу къалавгунма личIангу, дунияллийх цIа ларгсса тайннал балайчи Дато Кенчиашвили Да­гъусттаннайн концерт ккаккан дан увкIун къаивкIссания. Концертраясса асардугу чивчуну, танащалсса сурат Фейсбукраву дирхьуну махъ, балайчинал нину-ппу, гъан-маччами, дустал ва, нава кунма, танал творчество ххирами ттул дустал хьуна.

[pullquote]«Ина ваца жунма хъинну гъансса инсаннал мазрай чивчуну бур», — тIий, барчаллагьрай, хъамалу оьвтIий бия. Ламус булларчагу, дакI кIункIу тIий дияхха. Ахиргу лавгра. ХьхьичIва турист хIисаврай гьан тIий бивкIхьурча, утти лавгра ттунма дакIнин мачча хьусса, ттухва ялугьлагьисса инсантурачIан.
Аьрххилиясса асарду чIявуя, амма ссихьрал ттучандалуву цумур язи дугьанссарив къакIул ливчIсса чIиви душ кунма, ссая байбишинссарив къакIулну ливчIунав буккултращал кIикъабавчIунма. [/pullquote]

[dropcap]Б[/dropcap]ухмур Ттуплисуллал кIи­чIир­ттавух хьхьичIазаманнул рухIирдах вичIилий, эмаратсса архитектуралия ябатIин къа­хъанай бивкIра увкукун, Тамази-мяммал (Датолул бутта, тайнналгу мямма учайсса бур буттайн, ниттийн – дэда): «БацIу-бацIу, ттул душ, вин ххуйми кIантту ккаккан бувассарча, Сванеттия, Хевсуретти, Тушетия ккавккукун, ина, макьнатIисрал кунма, кIункIу буллантIиссара шихун», — тIива. Навагу бувцунав цува тамансса шиннардий аьрали къуллугъ буллай ивкIсса Армяннал дазуйсса Шаумяни шяравун. Лак­рал щархъавун нанисса кунмасса асар бия щала ххуллийх. Лащаву зунтталгу, тIабиаьтралгу!
Лавгссияв Дато Кенчиашвилил каялувшиндаралу­сса оьрчIал студиялийнгу. Гай оьрчIал балайрдах вичIи дирхьуну буссаксса, ттула оьрчI заманнай сайки гьарца кьини радиолувух баяйсса Шагьимардан Акниевлул ОьрчIал хорданул балайрду асардай щуруй бия. Лащавукьай макьанналгу, такьвардалгу. (Студиялия чичинна личIину).
[pullquote]Чун биярчагу, асарду ливчIунни – гуржи инсантал бушиву дакIру тIиртIусса, пиш тIийнмасса, цал кка­ккайхту, дакIнил ласласисса, дахIалай чинну ппухълуннал рувхIанийсса ирс буручлачисса. [/pullquote]
Тания шинмай шин ккуру гьаннин мукьилчин лавгра на тихун. Ва базилух бакIрайн багьра, Аьрасатнал ПаччахIлугърал Думалул депутат Сергей Гаврилов Православиялул ассамблеялул батIаврийн увкIун, та Гуржиял Парламентрал хъунаманал креслолий щяитаву сававну, щара-кIама лавхъсса оппозициялул партиярдал чул бувгьусса агьлу ХIукуматрал къатравун був­ххун, низам лиян дурсса кьини, ххуллий буну я телевизор, я интернет ххал дансса сантгу дакъа, ссаячIавгу хавар бакъа.
«Мийхсса тагьар чIалай да­къарив, бачу шихунмай», — оьвтIий бия ттуйн уссурссу. Нарив, цайми туристал кунма, цукунчIавсса вас-ццахгу бакъа, ттунма навалу хьхьувайгума сивсуну занай бура жагь Бухмур Ттуплисуллал кIичIирттавух, жагь чIаххувсса шагьрурдайн.
Гьарца тихун лавгтари, хьхьичI­ва-хьхьичI ссал хIайран бара чирча, полициялул зузалт­рал хъамаллурахсса хIурматрал, цума-цагу турист вихшала дишин уллалисса. Пулансса кIану цIуххирча, анжагъ бувчIин къабувну, уруглантIиссар хъирив. КIи-шанбачIурду чIявусса Бухмур Ттуплисуллал кIичIирттавух цамур чулийнмай кIура баярча, хъирив лавну аьркиннин биян бантIиссара.

«Аьрасатнавасса турис­туран шикку цукунчIавсса нигьачIаву дакъассар. Хъамаличунал бакIрая чIара дагьаву – жул миллатран кьюкьала­сса ишри. Хъамаличунал кьимат жул ппухълунначIа бюхттулну бивкIссар, жуйнгу аманат бувссар. Политика политикалул ххуллий, хъамаличу – хъамаличунал ххуллий», — тIий, чичлай бия ттучIан дустал.
Амма, цуксса туристуран нигьачIаву дакъассар тIурчагу, зурул лажиндарай Ттуплислив хъанахъисса ишру къабувккунни туризмалул бизнесрал чIарах.

[dropcap]М[/dropcap]итингру хьхьара хъанай дакъахьурчагу, туристуралмур оьрму цила кьаралданий най бия. Лавгра нагу тайннал турфирмардащал тамансса тарихийсса кIанттурдайн сайрданий: дунияллий ца яла хьхьичIавамур шагьрулун ккаллисса Мцхета шагьрулийн; Шота Руставелил «ЦIиникьрал луттираву­сса нарт» поэмалуцIун бахIусса Вардзия тIисса аьрщарал вивсса шагьрулийн. Ххал бав Лермонтовлул «Мцыри» поэмалуцIун бавхIусса ахIрам къатта Джвари; Ахалцихе шагьрулийсса дунияллий ца яла цIанихсса тарихрал ва архитектуралул гьайкалданун ккаллисса монастырданул комплекс Рабат; Пиросманил музей-къатта. Вана варихха Алла Пугачевал «Миллион алых роз» балайлувусса хъункIултIутIив ласун бавххусса къатта. Ттуплислив гастроллай бувкIсса палангнал балайчи Маргарита дэ Севрдух эшкьи хьуну, ганил ччанналун дичин щала Гуржиянава тIутIив дучIан дурну дур Пиросманил, цува тIурча, эшкьигу бакIуйн къадурккун, бусса оьр­мулий ливчIун ур цал дукансса дукралух суратру чичлай.

[dropcap]Б[/dropcap]ивра бутта хъин хьун лаглай ивкIсса Боржоми шагьрулийнгу, Лакку билаят хьхьичI бацIан буллалисса караматсса Сванетиянавунгу, аьламатсса Алазаннал даралувунгу, аьнтIикIа Казбек зунттул ухнилусса шяраваллавунгу.
Чун биярчагу, асарду лив­чIунни тайннал инсантал бушиву дакIру тIиртIусса, пиш тIийнмасса, цал ккаккайхту, дакIнил ласласисса, дахIалай чинну ппухълуннал рувхIанийсса ирс буручлачисса.
P.S. Гуржиял билаят бур Дагъусттаннал агьлу бигьалаган гьан-бучIангу яла гъансса, жиплингу къулайсса. Мунийн бувну 2014 шиная шинмай ялу-ялун тIутIайх дичлай дия Гуржиял ва Дагъусттаннал уртакьсса туризмалул бизнес. Амма, махъсса ишру сававну, жула инсантал махъаллил хъанай бур тихун гьан. Соцсетирдайхчил на Гуржиянаву бивкIшиву кIул хьуми, цIухлай, чичлай бур тих нигьачIаву ду-дакъашиврия. Ттунна къаасар хьунни.

Зулайхат Тахакьаева