ХIакьину, бигьасса оьрмулул хъирив цинявппа шагьрурдайн бивзун нанисса чIумал, захIматсса шартIирдах къабурувгун, шяраваллаву ялапар хъанай, хъу-лухччигу зузи дурну, ятту-гъаттарагу ябуллай жула зунттал щархъурду дуручлачисса инсантурах ляличIиссава хIурмат-кьиматрал ябитлай буру жува. Мукунминнавасса цану ур ЦIуйшиял шяравасса Мадал арс Аьвдулхаликь Мадаевгу.

---

Андриана Аьбдуллаева
[dropcap]З[/dropcap]ахIмат ххирашиву, бажар бушиву ванан канил кушулул усттарсса цала буттая дирсса хасият духьунссар. Ряхва оьрчI бусса кулпатраву Аьвдулхаликь ур чIана-чIивима. 1938-ку шинал ванал нину-ппу Гуржинавун бивзун бивкIун бур. Аьвдулхаликьгу тих увну ур 1942 шинал.

[pullquote]Винма яла захIмат хъанахъимур масъала ци бур куну цIувххукун, Аьвдулхаликь ур гъа­ттарансса лазундарал масъала захIмат шайшиву, комбикорма ххирану бушиву, кIи рутан 1200-1400 кипру бан багьайшиву буслай.[/pullquote]

[dropcap]М[/dropcap]ада, дувссилул, муххал давуртту дуллай, цала маэшат буллай ивкIун ур. Къатрал хIаятраву бивкIун бур цува заллусса ттучан. Аьвдулхаликьлун цIанагу дакIний бур чIивиний цува пурш бишлай, буттан кумаг буллай ивкIсса куц. Вайннал кулпатраву цинявннан, ­оьрус маз ва лакку маз бакъассагу, гуржи мазгу ххуйну кIулну бивкIун бур. 1956-ку шинал, Аьвдулхаликьлул шанма класс бувккусса чIумал, кулпат буттал улклуйн зана хьуну бур. Школа ванал Ккулув къуртал бувну бур. Мунияр махъ ца шинай зий ивкIун ур Азирбижаннай, Бена шагьрулий, навт буккул даврий. Тани ва ивкIун ур щала Азирбижаннай ца яла жагьилма спортрал мастер (классикалул лачIун буккаврил). Ца шинава аьралуннаву къуллугъ бан лавгун, сайки 10 шинай къуллугъ буллай ивкIун ур Германнаву. Мичча Аьвдулхаликь гьан увну ур дуклан Ураллайн. Челябинс­калий сержантътурал школагу къуртал бувну, махъунай тIайла увккун ур.

[pullquote]НакI-нис даврия личIину хъунмасса хайр бакъар, дурцIу дикI дуллан бикIару. Жул клиентътал бу­ссар МахIачкъалалив, Москавлив, Ростоврай…[/pullquote]

Радиотелеграфистнал пишагу лавхьхьуну, 1-мур классрал радист хьусса Аьвдулхаликь ивтун ур яла хъунмамур станциялул начальникнал хъиривчуну.
Укун буслай ур цува Аьвдулхаликь:
— Балтий хьхьирил зуманив 25 метралул куртIшиврий аьрщарал лувсса радиостанциялул хъунаману ия Эдик Къулиев тIисса азирбижан. Танал увцунав на цала хъиривчуну, цува лагайхту, хъунаманал къуллугъ ттуйн тапшур бансса пикрилий. Нава рязисса къуллугъ бия. Амма шярава нину-ппу оьвтIий бия, шавай зана хьу тIий. Хъунаманан на цукунчIав тиччалу кьабивтун ччай бакъая. КIива зуруйсса итаавкьунав, шавайгу ивну учIан. Амма на зана къавхьуссара.
Хъунаманангу къаучIаншиву баян бувну, Германнавунсса нуз ларкьуссия.

[dropcap]Ш[/dropcap]яравун учIайхту, оьрму ккавксса, канихь касму дусса, чIярусса шиннардий аьралуннаву къуллугъ буллай ивкIсса Аьвдулхаликьлун даврил буру­ккин къабагьну бур. Ялунгума ванайн личIи-личIисса идарар­ттая оьвтIий бивкIун бур. Аьвдулхаликь ивтун ур Ваччавсса «Урожай» ДСО-лул хъунаману, райондалул шяраваллил хозяйствалул управлениялий ва аэропорт­рай радистну.

Сайки 40 шин дурну дур Аьвдулхаликьлул Ккуллал райондалул спортрал ва жагьилтурал иширттал къуллугърай. Цаппара шиннардий зий ивкIун ур шяраваллил советрал председательну. Шяравун зана хьуну махъ ванал дурцуну дур щарсса: цацIунма бавкьусса къатта-къуш буру­ччин кIулсса кулпат бакIрайн багьавриягу рязину ур. КIия цачIун хьурча, кьун бутайссар учай. КIинналагу хIарачатрацIух вайннал зузи дурну дур «Щунудагъ» цIанилусса фермер хозяйство, мукьцIалва яттил хIайван, микссава оьл-кьунча бусса.

Аьвдулхаликьлул ва Ххамислул 5 оьрчI бур. Ца арс Малик кулпатращал шяраву ялапар хъанай ур, ва цувагу ЦIуйшиял шяраваллил администрациялул бакIчину ур. Мукьра шин хьуну дур вайннал хозяйство зий. Дузал дурну дур ттизаманнул шартIру. МахIачкъалалия хозяйствартту ххал дан бувкIсса комиссиялул вайннал хозяйство санитариялул ва цаймигу тIалавшиннарду щаллу дуллалисса ца яла ххуймунин, марцIмунин ккалли дурну дур. «ХьхьичIра-хьхьичIри ятту-гъаттара бусса кIанай кьанкь къаришлашисса», — тIий бивкIун бур комиссиялувуми.
Винма яла захIмат хъанахъимур масъала ци бур куну цIувххукун, Аьвдулхаликь ур гъаттарансса лазунилул масъала захIмат шайшиву, комбикорма ххирану бушиву, кIи рутан 1200-1400 кипру бан багьайшиву.

— Ваччав, ЦIувкIрав арендалий лухччи ласара. Мукьва зуруй зунттаву, 8 зуруй къутаннай ябуллан багьай. Вагу бигьасса иш бакъар, — тIий ур Аьвдулхаликь.
ХIукуматрая вайннан кумаг бакъар. Гьарица аьркинмур цала щаллу дуллай бур. Вайннал хозяйство дахьра нирхирайн дагьну дур. Уттинин, ши­кку ттизаманнул шартIру дузал дуллай ва аьркинсса техника ласлай, чIалансса хайр ласунсса иш хьуну бакъар. – НакI-нис даврия личIину хъунмасса хайр бакъар, дурцIу дикI дуллан бикIару. Жула клиентътал бу­ссар МахIачкъалалив, Москавлив, Ростоврай, — тIий ур Аьвдулхаликь.
ХIарачатран барачат учай­ссар. Цанмагу, цайминнангу мюнпат буну зузисса, захIмат ххирасса, хIарачат бусса Мадаевхъал кулпатран барачат чан бакъассар. Зу дуллалимуницIун Занналгу кабакьиннав!