ХIурмат бусса Руслан Башаев ва «Илчи» кказитрал редакцияй!

ЗуйхчIин дакIнихтуну хъунмасса барчаллагь учин ччай бура МахIачкъалаливсса Перинаталь центрданий зузисса хIакин, жула лакку инсан, Карашрал шяраватусса Ислангарайл душ МахIаммадова Людмилахь.

Кару мусилсса, ихтилат нахIусса, хасиятрал бавкьусса хIакьсса хIакиннал захIматрахлу цийн барчаллагь хьуннав.
Жул кIива душнил ялун увсса оьрчIайн азарханалий хъахъи цIуцIаву дирну, захIматну уссия. Людмилал, цуппа ялув бавцIуну, гьар кьини мунах буругангу занай, хъунмасса захIмат бивхьунни жул оьрчI уруччин. Укунсса хIакинная жула миллатрангу кIул хьувча тIий, «Илчи» кказитрайхчингу бусан ччан бивкIунни.
Перинаталь центрданий Людмила хIисавну бия ца яла опыт бусса, бусравсса хIакиннан.

Пахругу багьлай бия жула миллатрая гукунсса даражалул хIакин буккаврия. КъакIулнангу кIул хьувча, кIулнангу тикрал хьувча тIий, чичлай бура зучIангу ва чагьар.

Нагу Буйнакскалий ялапар хъанахъисса пенсионерка, Гъумучатусса Дибирова Магьликаят

---

Залму АьбдурахIманова
Вана укунсса чагъар був­кIунни уттигъанну жу­чIан.
ХIакьину хIакинтурахь ва учительтурахь укунсса журалий «Барчаллагь!» учайссагу нажагь акъа къахьунаакьайсса заманагу бухьувкун, ва хIакинная кIул бан Перинаталь центрданийн оьвчайхту, ттущал телефондалувух гъалгъа тIисса душварал: «Жул Людмила Ислангараевна мяйжаннугу лайкьссар яла лахъми цIардан», — куну, ганил телефондалул номер буллуна.
Хьунагубавкьуссияв жу Людмилащал азарханалий даврия махъ, ахттакьун бизулуву, ванил кабинетраву. Даврия махъсса чIун диркIнугу, хIакиннал чагъардацIун дархIумур даву къуртал хьун дурану дия.
— Вари хIакинтурал пиша! Даврия махъмургу, бигьалагай гьантраймургу чIун жул лагай­ссар даврия ят къабувцун, — куна байбихьулийва Людмилал.

[dropcap]Б[/dropcap]увну бур Людмила Карашрал шяраватусса Юсупов Ислангарайл ва Аьишатлул кулпатраву. Ва чIивинийва нину-ппу МахIачкъалалив бивзун бур яхъанан. Ванил ппу Ислангарай, Къазаннал университет­рал юридий факультетгу къуртал бувну, зий ивкIун ур Элисталий, Ставрополлай ва цаймигу кIанттурдай. Дагъусттаннайн зана хьусса ппурттуву ванайн тапшур бувну бур Гъумук Лакрал райондалийсса КГБ-лул хъунаманал къуллугъ. Ниттил Аьйшатлул, дуккаврихсса гъира хъунмасса бивкIнугу, циламур оьрму хас бувну бур ласнан ва цила кIивагу душнин. Вайннал чIивимур душгу, Юсупова ХIурия, Карашрал шярава цалчинсса филологиялул элмурдал доктор хъанай бур.
[pullquote]2017 шинал, жула республикалий
«Мама ПатIимат» тIисса Перинаталь центр тIитIин хIадур хъана­хъисса ппурттуву, ванийн оьвкуну бур ми­ккун хъунама хIакиннал хъиривчуну зун. [/pullquote]29

Мусил медальданий МахIач­къалаллал 33-мур школагу къуртал бувну, Людмила ниттил насихIатрайну дуклан бувххун бур Дагъусттаннал медициналул институтравун. Ххуйсса ккаккиярттащал дуккаву къуртал дур­сса жагьилсса хIакин тIайла бувккун бур зун Белгородрайн. Гикку къуртал бувну бур акушер-гинеколог хьунсса кIира шинайсса интернатурагу. УрчIра шинай хIакинну зий бивкIун бур шагьрулул хъаннил консультациялий, яла ванийн оьвкуну бур роддомрай зун. Цаппара хIаллава бивтун бур азарханалул отделениялул хъунмурну. 1991 шинал Людмила цила кулпатращал оьрмулул бугьарасса нину-ппу яхъана­хъисса МахIачкъалалив зана хьуну бур. Цила пиша ххаллилну кIулсса хIакин кьамул бувну бур шагьрулул 2-мур роддомрайн. 2017 шинал, жула республикалий «Мама ПатIимат» тIисса Перинаталь центр тIитIин хIадур хъана­хъисса ппурттуву, ванийн оьвкуну бур миккун хъунама хIакиннал хъиривчуну зун.
Медициналуву зузисса 26 шинал мутталий Людмилал циксса чIивитIулт каруннавун къалавсхьунссар ва циксса хъаннин цIунцIия хьхьара-лагь дансса дару-дарманну къабувхьунссар.
Ванил цилагу бур кIива душ. Вайннал язи бувгьуну бур медициналия архсса пишарду.
— Людмила Ислангараевнай, буси ва Центр тIитIаврил агьаммур мурадрая ва республикалул медициналуву ванил бугьлагьи­сса кIанттуя. Цукунсса хъами кьамул байссар шиккун?
— Сайки кIира шинал хьхьичI тIивтIусса ва Республикалул Перинаталь центр хIисавссар Ух­ссавнил Ккавкказуллай ца яла хъунмасса ва оьрчI бан бувкIсса хъаннинсса хIаллихшиннарду чIярусса центрданун. Ши­кку бу­ссар районная ва цайми шагьрурдая бувкIсса хъами кьамул бай­сса, циняв хIакинтурал ххал байсса поликлиникагу. Утти­гъанну шиккун бизан бунни республикалул Медико-генетикалул центргу. Ши­кку 150 хъамитайпа уттубишин бан­сса кIану буссар, уттигъанну ххи барду гинекологиялул азарду дусса къашайшалт уттубишин бансса 20 кIанугу. Уттубишин байссар оьрчIан ва ниттин нигьачIаву хъуннасса, районная тIайла бувксса хъами. ЦIу бутIуй МахIачкъалалиясса хъами кьамул къабуллан кусса икьрал дуссия. Утти махъ, хъаннил ва лякьлувусса оьрчIал цIуллу-сагъшиврунсса нигьачIишиврух бурувгун, мигу кьамул буллан бивкIру. Жул центрданул ляличIишиву цири учирча, цIуллу-сагъшиврул заэв­сса, нигьачIисса тагьарданува личин бувасса оьрчIру 3 шин хьуннин жул хIакинтурал янилу бикIайссар. Ниттихъал чIун-чIумуй ми ххал бан бувцуну бучIайссар. Щукру Аллагьнайн, Центр зузисса вай кIира шинал мутталий жущара хъунна­сса даву дан бювхъунни, агьалинал жуйннасса вихшала цIакь хьунни.
-Ци маслихIат банна ина хIакьинусса кьини жула хъаннин, та-бунугу нинухъру хьунтIисса жагьилсса душвавран?
— ХьхьичIва-хьхьичI, на жула хъами-душвавран маслихIат бавияв, азар, цIунцIия лахъи лаган къариртун, чIун-чIумуй хIакинтурачIан занан. Гьарма, цала чурххал базурдах къюкIну къаивкIун, азарданул дайдихьулийва хъирив уккан аьркин­ссар. Ялагу ччива, ва цIанасса заманнай инсан хъяврин ан ччимигу къачансса чIумал, цахъи личIлулну бикIан. Хъамитайпа тIабиаьтрал, Заннала ляхъан бувссар нину хьуншиврул, дунияллул оьрмулул мяъна-мурад буруччиншиврул. Мунияту хъамитайпа хъамитайпанува ливчIун ччива.
-Барчаллагь вин хъунма­сса! ТIайлабацIу хьуннав гьарца ина­ва бивзсса шаттираву.