[dropcap]И[/dropcap]юльданул 7-нний Къизилюртлив бувкIун бия АьФ-лул 11 региондалиясса ва жучIанма гъанссачил билаятирттал (Азирбижаннал, Турциянал ва Къазахъисттаннал) делегацияртту «Сабантуй» тIисса федерал фестивальданий гьуртту хьун. Му фестиваль шайссар 2001 шиная шиннай гьарца шинал личIи-личIисса кIанттурдай. Гьашину хъамал кьамул бунни Дагъусттаннал. «Сабантуй» тIисса шадлугъру даврил мурадну хъанахъиссар уссушиврийсса халкьуннал дянив арарду цIакь даву, культурарду ва аьдат­ру дахханаххи даву. Мукунсса иширттал чIалачIи буллалиссар миллатирттал дянив дакьаву дуручлачисса, исвагьисса, хъамал ххира­сса, уздансса Дагъусттан улча.

Татарсттаннаясса журналистнал буллусса суалданухьхьун жаваб дуллай, ДР-лул ХIукуматрал председатель Артем Здуновлул увкунни: «Жулва миллатирттал дянив аьмсса, гъансса затру чIявусса бур, амма бур кувнная кувннал ла­хьхьин аьркинссагу. «Сабантуй» – му гьармунияр хьхьичI цашиврул, культурартту хIала духхаврил байранни. Да­гъусттаннайн бувкIунни билаятрал регионнаяссагу, гъанми билаятирттаяссагу делегацияртту. Миккугу жунма дакIния буклай бакъар регионну экономикалувугу хIала-гьурттуну зун аьркинну бушиву. Масалдаран, промышленностраву, туризмалуву. ХIакьину Дагъусттаннал ккаккан дунни циламур культура, хъамал ххирашиву – ми гьарзат хIисавравун ласайссар ва миннул республикалул сий лахъ дуллалиссар».
Татарсттан Республикалул ХIу­куматрал председательнал хъиривчу Василь Шайхразиевлул бувсунни «Сабантуйрай» цала делегациялун ккарккун душиву Дагъусттаннал миллатир­ттал цашиву ва ми бавкьуну ялапар хъанай бушиву.