Жулла республикалийсса оьрчIансса 32 поликлиникалийн дуркIун дур цIусса оборудование. Аьмну Дагъусттаннал шагьрурдайх ва районнайх уттизаманнул 300 прибор дарчIуну дур. Ва даву щаллу дангу бювхъуну бур « ОьрчIансса поликлиникарттал ва азарханардал материал-техникалул база цIу буккан баву» тIисса программалул лагрулий.
ОьрчIал цIуллу-сагъшиву ххал дуллан жучIанма лавсун бувкIссар цIусса УЗИ-лул аппаратру, яруннал, вичIал, кьакьарттул цIуцIавуртту ххал дайсса оборудование, электрокардиографру ва цаймигу матахI. 2018 шинал вай хъус ласун итадаркьуну диркIссар 312 млн.арцул, миннува 15 млн. — республикалул бюджетрава.
Утти жула хIакинтураща бюхъантIиссар, дахьра сукку хъанахъисса азарданул хъирив лавну, дайдихьулийра мунинсса дару-дарман лякъин. Районнал азарханардайва, шагьрурдайн къабувкIнува, бюхъантIиссар оьрчIал цIуллу-сагъшиврулсса буллан.
ДР-лул цIуллу-сагъшиврул министрнал хъиривчу Раиса Шагьсиновал бусаврийну, гьашину республикалул 7 поликлиникалий щурущи дувантIиссар «Аякьалийсса поликлиника» тIисса цIусса проект. Вай давурттан республикалул бюджетрава 15 млн.арцул итабакьин ккаккан бувну бусса бур.
