Ялу-ялун чялиш буклай бур Лакку улча цIу буккаврил цIаний зузисса лакрал жагьилтал. ЧIярусса давуртту дурунни уттинин лакрал щархъаву жагьилтурал каширдацIух. 

Хъуннасса хъар цайнна ларсун, зий бур ЧIарттал шяраваллил жагьилталгу. Цала гужирдацIух вайннал биялну уттагу бувну, бакьин бунни шяравунсса ххуллу. Чулийн дуккан дуллай бур личIи-личIисса цаймигу сиптарду.

---

Зулайхат Тахакьаева
МахIачкъалалив ялапар хъанахъисса жагьилсса ишбажаранчи Калеб Шмидтлул (ХIажиев Мусттапа Шагьабуттиннул арснал) сипта хъин чулий ккарк­сса ДР-лул культуралул министерствалул кабакьаврийну ва шяравасса ишбажаранчитурал кумаграйну ЧIарттал шяраву тIивтIунни оьрчIансса бигьалагай лагерь «Зунтталчу». Му иширал ялув, чIявусса агьалигу бавтIун, хъуннасса шадлугъ хьунни бигьалагай гьантрай шяраву.

Гьуртту хьунни микку райондалул администрациялул ва магьирлугърал зузалт, шагьрурдая бувкIсса шяраваллил агьлу.
Лагерьданул яла агьаммур мурадну бур ватандалуя архну хъуни хъанахъисса оьрчIан лакку маз лахьхьин бансса. Ва базилух лагерьданий игьалаган увкIун ур Аьрасатнал шагьрурдай ялапар хъанахъисса 60 оьрчI.
Лакрал райондалул администрациялул бакIчинал хъиривчу Амсар Къажлаевлул кIицI лавгунни укунсса центрдал хъуннасса агьамшиву душиву лак­рал оьрчIру-душру шяраваллавунмай кIункIу бан, ми зунттал багьу-бизулущал кIул бан, лакку маз лахьхьин бан.

Москавлияту увкIсса жула хIурмат лавайсса аьлимчу ХIажи Аьлиевлул кIицI лавгунни гьарца гъи цала рутайшиву буттал шяраву. «Игьалаган хьуннав, къуллугърал аьрххилий хьуннав, на ивну ура дунияллул 35 билаят­райн. Амма, Лакку билаят кунма, аьнтIикIасса кIану ттун цамур къахьунабавкьуссар. ДакIгу, ватандалий кунна, дигьаларгун, ххарину чувчIав къадикIай», — увкунни ванал.
Шадлугърай гьуртту хьунни райондалул магьирлугърал зузалт, пагьламантал, гастроллай бувкIсса Лакрал театрданул артистурал ккаккан дурунни ххаллилсса концерт «Чагъан­ттул чIурду».