Зиявуттиннул арс Увайсов Мусаннип
Оьрмулул 83 шинаву Къазахъисттаннайсса Алма-Ата шагьрулий ахиратрахьхьун лавгунни цала жяматрангу аьзизну ивкIсса, Дагъусттаннал циняв миллатирттангу бусрав хьусса Зиявуттиннул арс Увайсов Мусаннип.
Мусаннип увссар Ххутрал шяраву 1935 шинал. Буттал шяраву 7 классгу бувккуну, нитти-буттащал ивзссар Къазахъисттаннайн, та чIумалсса хъуншагьру Алма-Аталийн.
1954 шинал Актюбинскаллал педучилищагу бувккуну, байбихьулул классирттаву дарс дихьлахьаврия айивхьуну, республикалул хIукуматрал ларайсса давурттайн ияннин зий ивкIссар. Къазахъисттанналгу, Къиргъизналгу муххал ххуллул школарттал ва дуккаврил идарарттал каялувчину зузисса чIумал Мусанниплун дуллуссар генерал-лейтенантнал цIанищал архIал дацIлацIисса чин.
Мусаннип цимилагу увчIуну ур Алма-Ата шагьрулул ва райондалул советирттал депутатну. Лайкь хьуну ур СССР-данул «ХIурматрал лишан» тIисса кIира ордендалун, Къазахъисттаннал «Достык» («Дусшиву») тIисса ордендалун ва чIярусса медаллан. Мусаннип ия Къазахъисттаннал халкьуннал дуккаврил отличник, СССР-данул просвещениялул отличник. Ванан чирчуну дур зувиннияр ххишаласса, кIулшивурттал аралуцIун дархIусса элмулул давуртту.
Ххирая Мусаннип гъурбатрайгу, буттал миналийгу. Даимангу цала буллусса махъ бацIан байсса, цуксса хъунисса хIукуматрал давурттай зий ивкIнугу, цукунчIавсса пахру-ххара бакъасса Мусаннип жула дакIурдиву абадлий личIантIиссар.
Мусаннип жуятува личIи шаврил пашманшивугу кIидачIлай, дакIнихтунусса жижара буллай буру душваврахь, куявтурахь, миннал оьрчIахь, уссихь Буттахь, ссихь, ссурахъаврахь, цинявппагу гъанцириннахь. Мусанниплул аьпа баннав, алжан нясив баннав.
Ххутрал жямат
Закирдул арс Гунашев Камил
Уттигъанну оьрмулул 79 шинаву жуятува лавгунни ДР-лул лайкь хьусса хIакин, ДР-лул хъунама рентгенолог, щалагу цала оьрму инсаннал цIуллу-сагъшиву дуруччаврин хас бувсса уздансса лаккучу, Закирдул арс Гунашев Камил.
Увну ур Камил 1939 шинал Гъумук Гунашхъал Закирдул ва РайхIанатлул кулпатраву. МахIачкъалалив 5-мур школа къуртал бувну махъ увххун ур Дагъусттаннал мединститутрал хъин бай факультетрайн. Институтрал хъирив аьралий буржгу лавхъун, захIматрал ххуллу байбивхьуну бур шагьрулул 2-мур азарханалий рентгенологну зий. Кандидатнал диссертация дурурччуну махъ зун ивкIун ур ДГМИ-лул лучевой терапиялул кафедралий – ассистентная айивхьуну, кафедралул хъунаманайн иянцIа.
Укунминная учай «Дунияллийна хIакин хьун увкма» куну.
Камил ия хъинну цала пиша ххирасса, куртIсса кIулшивуртту дусса, мяйжаннугусса цала даврил минахур, инсаннал чIарав ацIан хIадурсса, хъиншиврул бутIа ххишалану бивсса, лагма-ялттунащал хIал бавкьусса инсан.
Камил ахиратрал шаврил хъуннасса кьурчIишивугу кIидачIлай, жижара буллай буру ванал кулпатрахь, арснахь, душнихь, уссихь, гъан-маччанахь цинявннахьвагу.
Цал гьав нурданул дуцIиннав, алжаннул къапурду тIивтIуну лякъиннав. Махънал оьрмурдай барачат бишиннав. Амин!
Гъумучиял жямат
Хъуннасса пашманшивугу кIидачIлай, дакIнихтунусса жижара буллай буру Зиявуттиннул арс Увайсов Буттахь, ванал аьзизсса уссу
Мусаннип
аьпалувух ишаврийн бувну.
Цал бунагьирттал аьпа баннав, рухI рахIатний дишиннав!
«Илчилул» редакция
