Ларгсса нюжмаркьини МахIачкъалалив ДР-лул КIулшивуртту дулаврил ва элмулул министерствалий хьунни Дагъусттаннай «Сельский (земский) учитель» тIисса проект щурущи даврин хасъсса батIаву.

Залму АьбдурахIманова
Республикалий, хаснува щархъавусса школарттай, дарс дишинсса учительтал биял къа­хъанай бушиврул цIурувкьюсса масъалалий чIурчIавгу дуллай, ва проект жунна чара бакъа аьркиншиву кIицI лавгуна Дуккаврил министерствалул каялувчи Уммупазил Оьмаровал. Бувсунни ванил Дагъусттан ва ишираву «пилотный» регионну хъана­хъишиву, аьщуйн щун бувну учин, проект щала билаятрай щурущи дан хьхьичI жучIара ххал дигьлай бушиву.

[dropcap]П[/dropcap]роектрайн бувну шяравун дарс дишин нанисса учительнан хIукуматрал ца миллион арцул булунтIиссар, гикку 5 шинай зун рязину ухьурча.
— Гьарца шинах жулла республикалий педагогнал кIул­шивуртту дусса 2 азараксса пишакар итаакьайссар, миннаву 500 инсан – лахъсса кIул­шивурттащалсса. Цуксса хIайп­нугу, миннавух нажагьсса акъа-къаикIай учительну зун гъира бусса. Ва хъинну хъунна­сса диялдакъашивур. Мунияту ва проектгу хъунмурчIин учительтурал пишалул даража гьаз бансса, бусрав-сий лахъ дансса чаранни, -увкунни министрнал.

Бувсунни ванил республикалул школартту хъинну мюхтажну бушиву чил мазурдил дарсру дишайсса пишакартурах, хаснува цаппара шиннардива ва дарсгу чара бакъа дулунми ЕГЭ-рдал дарсирдал сияхIрайн ласунтIий бухьувкун.

Проектрал дайдихьулий ва «экспериментравух» гьур­тту хьунтIиссар 50 учитель-предметник. ЖучIара проектрал ккаккияртту хъанан диркIукун, миннуя бусантIиссар СКФО-лул гайми регионнахьгу, гайннал щархъал школарттайгу ва даву дайдишиншиврул.