Гъумучату баргълагавал чулийннай шанна-мукьра километралул манзилданий, ххаллилсса тIабиаьтгу дусса кIанттай, диркIссар Маркьиял шяравалу.Мунил лагма-ялттусса щархъурдуну хъанахъиссар: Ххут, НицIавкIул, ДучIими, ГьаркIассун, Бурттун.
[dropcap]З[/dropcap]унттава арив бизан буллалисса шинал Маркьиял шяраву диркIун дур 32 тIюва ва яхъанайгу ивкIун ур миннуй 107 инсан.
Шяраваллил зума-къирагърай буссар КъувтIи-Бичай-Зунтту тIисса бакIу. Му бакIул лахъшиврия ххал хьун бюхъайссар Лакку билаятрайсса ацIра шяравалу: Ххут, Бурттун, Варайми, Убур, Хьур, ХьурукIул, Хъунайми, Арчутти, Караши, Къурул.
ХьхьичIазаманнай Маркьиял лухччинийн бигьалаган бучIайсса бивкIун бур Гъази-Гъумучиял ва Азайннал шамххалтал.
Маркьиял чиваркI лагайсса бивкIун бур хIалтIилухун Аьрасатнавун – Иркутскаллал ва Саратовуллал областирттайн.
ТIалхIат-хIажи тIисса маркьиричу, цал Ссугъращиял, яла ИстIамуллал мадрасагу бувккуну, Мисриллал ал-Азхаргу къуртал бувну, теологиялул дарсру дихьлай ивкIун ур ИстIамлив, Аьшттарханнай ва Къазаннай. Угьара хьуну мукьах зий ивкIун ур Щурагьсса Мавраевлул типографиялий. Буттал шяраву ванал гьаттай бацIан бувну бур зиярат.
[dropcap]Б[/dropcap]уттал кIанттул цIанийсса Хъунмасса дяъвилул шиннардий хъун дакъасса Маркьиял шяравату аьрайн лавгун ур 24 инсан, 13 зана къавхьуну ур махъунай.
ЦIуссалаккуйн бивзун махъ ДучIиннащал ва НицIавкIуллащал цачIуну сакин дурну диркIссар «Правда» тIисса колхоз.
Маркьиял жяматрал арс Ризван Кьурбанов, юрист элмурдал доктор, зий ивкIссар ДР-лул прокурорнал хъиривчуну, ДР-лул Министртурал Советрал председательнал цалчинма хъиривчуну. ЦIанасса чIумал увчIуну уссар АьФ-лул ПаччахIлугърал Думалул депутатну.
ХIанапи Таймуразов, физика-математикалул элмурдал доктор, зий ивкIссар ДАССР-данул Министртурал Советрал председательнал хъиривчуну.
Намруд Бижанов, тарихрал элмурдал кандидат, зий ивкIссар Дагъусттаннал университетрал ректорнал къуллугърай.
Аматуллагь ХIусманов, шяраваллил хозяйствалул элмурдал кандидат, чIярусса шиннардий зий ивкIссар Хасавюртуллал райондалийсса Султановлул цIанийсса совхозрал директорну.
Зоя Бабаева, экономикалуцIунсса философиялул доктор, зий бивкIссар «Профессиональный бухгалтер и аудитор» тIисса журналданул хъунмур редакторну.
[dropcap]Ч[/dropcap]Iявуссаннан кIулссар Дагъусттаннал ветеринариялул аралуву хъуни-хъунисса къуллугъру бартбигьлай ивкIсса специалист Жалут Кьурбановлул цIагу.
ЦIанасса чIумал, шамилчинсса цIусса миналийнгу бивзун, Маркьиял жямат яхъанай бур Новостройрайсса ДучIиннал шяраву.
