Аьрасатнал виваллил иширттал министр Владимир Колокольцев увкIунни МахIачкъалалив.
Министрнал совещание дунни Аьрасатнал МВД-лул Ухссавнил Ккавкказуллал федерал округрал ва Дагъусттаннал Виваллил иширттал каялувчитуращал. Вайннал бувсунни цачIарасса оператив тагьардания.
А. Аьбдуллаева
В. Колокольцевлул чIурчIав дунни хьхьичI ххуттайн ласунсса масъаларттай. Тапшур бунни сакиншиндарайсса тахсиркаршиврийн, экстремизмалийн, коррупциялийн, закондалуцIун къабавкьуну ярагъ ишакаш баврийн къарши бацIансса, мукунма жяматийсса кIанттурдай низам дуруччинсса, паччахIлугърал хIаллихшиннарду бартдигьаврил даража гьаз бансса ххишаласса чаранну лякъин.
[dropcap]М[/dropcap]ахIачкъалаллал Ленинский райондалул полициялул отделданийн увкIсса чIумал, В. Колокольцевлул ихтилат бунни зузалтращал, ххал дунни вайннал шартIру. Ва аьрххилий министр мукуна ивунни Дагъусттаннал МВД-лул МСЧ-райн (медико-санитарная часть), ихтилат бунни микку зузиминнащал ва уттубивхьуминнащал.
КIулну бикIан, Дагъусттаннал МСЧ-рай хъин хьун бучIайссар, Дагъусттанная бакъассагу, Аьрасатнал цайми регионнаяссагу полициялул зузалт. Шиччалу дузалну буссар ттизаманнул оборудованиялул. Мунийн бувну, шикку зузисса пишакартураща бюхълахъиссар хьхьичIунсса кьяйдардай диагноз дишин ва хъин бан.
