Июнь зурул 8-нний Россельхозцентрданул ФГБУ-лул филиаллал дурсса ххал бигьавурттал исват бунни Дагъусттаннал ва Чачаннал дазуйсса 900 гектар аьрщарайн хъацIру багьну бушиву.
Вай давурттавух гьуртту хьунни Дагъусттаннал ххяххияртту дуруччаврил станциялул отделданул хъунама Шамил Аьвдуссаламов, вава станциялул ухссавнил райондалиймур филиалданул хъунама Аьли Аьлиев ва районнал отделлал каялувчитал. Аьмну ва комиссиялул ххал диргьунни 10 азарда гектар аьрщарал. Хъуннасса къулагъасрайн ларсун, личIинура ххал диргьунни ларгсса шинал хъацIру багьну бивкIсса аьрщив.
Шамил Аьвдуссаламовлул кIицI лавгунни, хъацIурдий хъару ххяхханнин, бакIрайва миннул ккунукру бивхьусса кIанттурду аьлтту баврия мюнпат хъунмасса шайшиву. Мунийн бувну, Россельхозцентрданул кIивагу филиалданул икьрал дунни вай аьрщив хъацIурдицIа марцI даву мурадрайсса давуртту чялиш дуккан дансса.
Шяраваллил хозяйстварду дачин дурсса кIанттурдайсса фермертураягу тIалав бунни хъацIру багьсса аьрщив дусса кIанттурдал хIакъираву мугьлат бакъа баян баву.
