[dropcap]Р[/dropcap]еспубликалул сайки циняр арардаву дуллалисса мониторинграл хIасиллайн бувну, жула медицина къаххуйсса тагьарданий лирчIун душиврул багьана-сававхъунмурчIинсса дусса дур азарханардай ва поликлиникардай пишакартал биялну бакъашивруву. Хаснура захIматсса тагьар дур шяраваллил кIанттурдай.
Мунияту республикалий цIуллу-сагъшиву дуруччаврил масъаларттаха зузиминнал ца яла приоритетсса масъаланугу бур медициналул идарарттайн хIакинтал бучIан баву, жагьилсса пишакартуравун микку зунсса гъира бутаву, гай щархъавусса азарханардай ва поликлиникардай зунсса шартIру дузал даву.
ХIакьинусса кьини ва тагьар укунсса дур. «Земский доктор/фельдшер» программалийн бувну щархъаву цIуллу-сагъшиву дуруччаврил идарарттай иялну акъар 421 хIакин ва 5 фельдшер. Дагъусттаннайсса пишакартурал кадрардах буругарча, аьжаивсса тагьар хIасул хьуну дур. Мисалдаран, шагьрурдай хIакинтал ххигу-ххишалану, зунсса давуртту дакъа бухьурча, щархъаву ми биялну бакъар 60-70 %.
ЖучIара «Земский доктор» программа цила ххуттавун дуртун, низамрай щурущи дарчан, тагьар цукссагу къулай хьунсса умуд бур.
[dropcap]Ц[/dropcap]аппара шиннардил хьхьичI ва программа жулла республикалий мува мурадращал щурущи дурнугу диркIссар. Мисалдаран, 2012 шинал аьмну 10 азараксса инсан яхъанахъисса районнал щархъаву хIакинтал биялшиврул чIалачIин (показатель) диркIхьурча 17,8, цIана дусса дур 20,2.
[dropcap]П[/dropcap]рограмма жучIара щурущи дурсса 2012 шиная шинмай щархъавусса азарханардай зун увкIун ур 1080 жагьилсса пишакар (2012 шинал – 248 инсан , 2013 шинал – 151 инсан, 2016 шинал – 245, 2017 шинал – 234, 2018 шинал – 202 инсан)
2014-2015 шинал, программалун арцу диял къахъанай, ва даву дялирчIун диркIссар.
Щархъавусса азарханардайн ва поликлиникардайн зун бувкIминнан бакъасса, 1 миллион арцул буллуссар 50 азаруннийн къабивсса агьали яхъанахъисса мюрщи шагьрурдай зун рязи хьуминнангу. 2018 шинал «Земский доктор» программалул лагрулий давурттал щаллу увссар 202 жагьилсса хIакин. 28 кIану ливчIссар хIакинтал биял къавхьуну. Ванийн бувну ларгмур шинал ишла къадурну лирчIун дур 28 млн.арцул.
2018 шинал ДР-лул ЦIуллу-сагъшиврул министерствалул хIакинтал биял къахъанахъисса кIанттурдайн тIайла бувккун бур 52 хIакин-терапевт ва 37 хIакин-педиатортал.
Гьашинусса программалул давурттан итадаркьуну дур 229 млн. арцул, вайннува 137 млн. 400,0 азарда къуруш – федерал бюджетрава ва 91 600 миллион – республикалул бюджетрава. Вай арцул кумаграйну ва шинал щархъавусса азарханардайн учIан ан бюхъантIиссар 224 хIакин ва 10 фельдшер.
«Земский доктор» программалул хъунмур мураднугу хъанахъиссар жагьилсса хIакинтал, ми чIумуйсса бучIан баву бакъасса, гиккува мина-гьанулул хьун бавугу.
ХIадур бувссар
З. АьбдурахIмановал
