[dropcap]В[/dropcap]ана гьашину ца шин хъанай дур ттул нину-ппу ахиратрал хьуну. Ттун бусан, чичин ччан бивкIунни минная, миннал бивтсса оьрмулул ххуллуя. Нитти-буттал захIмат щинчIаввагу, тачIаввагу хъамабитан къабучIиссар.Ттул нинугу, ппугу бувну бур 1-мур ЦIувкIрав, кIиягу бувну бур 1929 шинал. ЦачIу, ца классраву дуклайгу бивкIун бур. АцIния ару-арулла шинал оьрмулуву цаннан ца кьисматгу хьуну бур. Яла цачIу бувтун бур 70 шинай оьрму. Аьпалухьхьунгу лавгунни кIиягу ца шинал.

Ниттил бувккуну бур арулва класс. Тани шяраву арулва класс бакъа къабивкIссар. Гихуннайсса дуккаву дан къархьуна учайва, чIунгу захIматсса дуну. Буттал тIурча арулва классгу бувккуну, яла ЧIяйннал шяраву экстерну ацIва класс бувккуну бия. Муния махъ заочнайну Дарбант шагьрулийсса Культпросвет училищагу къуртал бувну бия.

---

Гьарца жалиндалун – ца-ца буттукьа

Буттан цала буттал лажин кIул­нурагу дакъая. Мунал гьаттайн иян лавгссара Бухара шагьрулийн тIун икIайва. Жагьилнура нинугу диркIуну дия. Дяъвилул шиннардий, личIи-личIисса сававрттайну уссу­ссугу ливтIуну, ва цувалу ливчIун ивкIун ур. Мунияту 17 шинал оьр­мулуву бувну бур кулпатгу.

«ЧIиви наврузбаг тIун бикIай­ва ттуйн инсантал» тIий, буслан икIайва ппу. Нинугу цурдалу кьариртун, лавгун ур Совет аьралуннаву къуллугъ буллан. Тикку дурну дур шанна шин ва дачIи – альпинистну зунттайх лахълай.
Бутта ия культуралул чулухунай ххишала акъа итххявхсса, гъира бусса инсан. Му пиша язи бувгьуну, янил жавгьар кунма, ягубувна, мунин хасгу бувна цала щала оьрмугу. Инсантурал ва Заннала культуралун куну увсса ур учайва. Ххаллилну изай­ва къавтIун, дайва акробатика, бищайва чагъана, учайва балай, рищайва дачIу. Ванал ппугу шяраву цалчин­сса ча­гъана бищу ивкIун ия, ми­ччасса гьунар загьир хьухьун­ссия буттавугу.

1957 шинал МахIачкъалалив хьусса Дагъусттаннал фольклорданул фестивальданий Ккуллал райондалул коллективравух гьуртту хьуну, 15 ххаржандалущалсса къавтIаву дурну, буттал бувгьуну бия цалчин­сса кIану. Ва гиччава уцлайгу ивкIун ур цIа дурксса «Лезгинка» ансамбльданувун. Нинугу, кулпатгу рязи къахъанай буну, къалавгун ур. Яла ва увцуну ур Гъумук тIивтIусса Лакрал театрданувун кIанил директор Минкаил Аьлиевлул. КIикку зий дурну дур 7 шин. Ккуллал райондалий Культуралул къа­тта тIивтIукун, райондалул хъуниминнал тIалав увну, кIикку директорну зийгу дурссар мяйра шин. Яла цала буттал шяравугу тIивтIукун мукунмасса къа­тта, увцуссар кIиккун директорну зун. Зийгу ивкIссар му даврий оьрмулул 70 шин хьуннин.
Буттал дуссар чIярусса наг­радарттугу. Культуралул зузала акъагу, шяраваллил жяматран ттул ппу кIулссия ххаллилсса тIаннул усттар, буттукьри буву, цалчинсса гъайтIала, цулуцала хIисаврайгу. Гьарца жалиндалун буттукьагу байссия. Наврузбаг ва жалин барча бан цала бувсса шаммардай балайгу учайссия.

Премиялун – лухIи-оьрчIи карши

Нину ПатIимат, хъу-лух­ччинуха, ичIаллиха зий, оьр­мулул 15 шинава байбивхьуну, 70 шин хьуннин бакъавцIуссар. Зий бивкIссар колхозраву 35 шинай звеневодкану. Бригадарттащал бяст-ччалли бувккун, муданмагу цалчинсса кIантту бугьай­ссия. Ца шинал, цилалу 25 дачIу дугьайсса хъу ттирхIуну, хIурматрал грамотагу, лухIи-оьрчIи каршигу ларсун дия ттул ниттил.

Бава дия гьарица даймунил сант дусса, хъинну хъамал ххира­сса. Цилагу чIявуну учайссия, «Чин дуллумур – ницIри, жура дуркумур – парар», — куну.
На бура кулпатраву хъунма-хъунмур, чIивину бунува на ни­ттил гьарца кIанайн цищала буцайвав. Мунияту ттун кIулли нину гьурттуну дуллай бивкIмур, бивзсса гьарца ша. Ца-цал ни­ттил ттуйн цила чIивимур ссил цIагума учайва, на хъунману чIалан бикIайхьунссияв.
ЦIана на нава хъуннабава хьуну бура, хъунмур оьрмугу лавгун бур. Амма, дунияллий буссаксса, ттул янил хьхьичIа къадукьан­ссар ниттил иминсса симан, ларсса хасият, инсантуращалсса хIал бакьаву.

ЗахIматсса азаруннил къашавай шаний шинну хьуна ниттил. Амма ттул ва зат цIий дур ва зат ччай дур кусса махъ къабуккайва зумату, цурда цайминнан захIмат къахьуншиврул.
Ттул нитти-буттал лякьлуя, ца на бакъассагу, бивзссар ялагу ряхва оьрчI. Амма, «жунма чивчумур чин къабучIайссар» учайхха, ниттингу, буттангу духIан багьссар оьрмулул нязаннив ливтIусса кIия-кIия арснал дард.

На ттущава шаймур був­ссар, амма яла багьайкун буван къавхьуннихха миннал хIурмат, минная архну буну тIисса асаргу бикIай дакIниву мудан.
Ваца ахир-мукъун кIанттай кунма ттун учин ччимургу вари – жагьилсса никирахь, жуланахь, чилнахь: «ХIурмат бувара нитти-буттахъал, ми сагъну бунува, миннал рухI-ссихI зулла чIарав дунура, яла пашман хъанай къаличIаншиврул!» — куну.

Калимат ХIажиева,
ш. 1-мур ЦIувкIул