Дагъусттаннай дакъа дигьакъалагай ттул дакI

ОьмархIажинал арс Султан ЦIаххаев

Увну ур май зурул 22-нний 1949-ку шинал МахIачкъалалив. 1967-ку шинал къуртал бувну бур Гъумучиял дянивмур даражалул школа. Мура шинал увххун ур Дагъмединститутравун,му къуртал бувну бур 1973-ку шинал. Зий ивкIун ур Лакрал райондалул азарханалий хIакин-травматологну. 1977-1979 шиннардий къуллугъ буллай ивкIун ур аьраяллил хIакиншиврий. Муния махъ зий ивкIун ур МахIачкъалаллал горздрав­отделданий, цIуллу-сагъшиву дуруччаврил министрнал хъиривчуну. 1995-ку шиная шинай зий ур ДР-лул ЗахIматрал министерствалул системалий эксперт-хирургну.
Ва ур лахъсса категориялул хирург.

---

1. Цукунсса хьуна оьрчIний вийнма яла гужсса асар биян бувсса зат, иш?
-ДакIний дур оьрчIшиврул шиннардивасса ца сурат. Жул, Буршиял, шяраваллия арх да­къасса Чини ар тIисса кIанай ххулув бувайсса лух­ччи дуссар. КIиччар дайдишай­сса жула лак­рал Хъуннехгу, зунттал ми­цIайсса марххала-микIирала чIявусса щаращив нанисса. Хъинну я батIин къашайсса кIану бу­ссар. Ттул буттал ппу ЦIаххуйлул гьарца шинал гъинттул, чятиргу бивщуну, жу кIиккун батIайвав. Нагу, нава кунмасса мюрщи ссурахъалгу, жула жагьилсса буттахъащал, оьрмулул 70-80-шинавусса буттал буттал, бучIан бувну зун­ттавун, жун дукра дуллай, жуха аякьа дуллай икIайва. Ппу, буттауссурвал, буттал ссура­хъал цачIусса му сурат хьхьичIа ду­къакьай. Утти икIара цал-цал пикри буллай, жугу лагма лаган бувну, жуяту неъмат ласлай икIайнавав буттал ппу тIий, хъиннува тамаша бизлай.

2. Цими никирайн дияннин­сса кIулли вин вила ппухълуннал нясав? Буси яла архманал цIа.
-КIулли мукьра никирайн дияннинсса. Ппу ОьмархIажи, бу­ттал ппу ЦIаххуй, кIанал ппу Аьли-Оьмар ва кIаналгу ппу Ибрагьим.

3. Инсаннал хасиятраву винна яла ккарккун къаччимур лишан?
-Лавмартшиву.

4. Вила оьрмулуву яла алши бакъамур шин.
-1977 шин. Ппу аьпалухьхьун лавгсса шин.

5. Яла алши бумур шин.
-КIива душнил ялун арс увсса 1982 шин. Цалчин хъунмур душ бувсса 1974 шин. Яла, душнил душ бувну, нава ттатта хьу­сса 1998-ку шин.

6. ВичIара циксса арцу хьувкун, дигьаларгун дикIанссия вил дакI?
-Ва суалданул пикри буллай, ца балжийсса жаваб ля­къин къархьунни ттувура. Инсаннан яхьунсса кIанугу буну, арцу дикIан аьркинни къатта-къушгу ябансса, гъан-маччанал, дустурал чIаравгу ацIан бю­хъансса, аьркинсса кIанай мюхтажнангу кумаг-ка дан хьунсса. Гихуннайминнул яла мяъна чIалай да­къар.

7. Инсаннал тахсирдава цумур тахсир хьунссия бигьану багъишла битан?
-Инсан аьйкьуну, хавар ба­къулий хьумур тахсир.

8. Бувагу къабитан?
— Банна тIий бувну оьбала­гу, му бувшиву щала жя­мат­рангу кIулну бунува, тахсир цайнма къаласлай, иттавгу уруг­лай, мукIру къахъанахъима.

9. Ссан диял къашай вил чIун?
-ТIайлану бусан, на хIа­ра­чат бувара чирчуну, сияхI дурну, гьарца нара данна кумур дуван, аьркиннийн иян. Ччарча, бу­ттал шяравун иянсса, ччарчагу, оьрчIал оьрчIащал аьлахъан­сса чIун лякъара.

10. Бартлавгун ччисса вила шанма мурад?
— Арснал арс уссар ттулла цIа дирзсса. Аллагьнал цIуллушиву дулурча, чан-кьансса оьрму буллуну ччива га арснал арснал хъатIий ца къавтIун изансса. Шанмагу мурадрахлу ва ца зат ччива учивияв.

11. Вила оьрмулуву хъинну ххирасса кIантту бувгьу­сса шама инсаннал цIа?
-Ттула ппу Оьмар-ХIажи, Хьуриятусса профессор Наби ЦIаххаев ва ттунма оьрмулуву чIявусса затру лахьхьин був­сса, маслихIатру бувсса ХIусайн Каримов.

12. Винма ххуй бизайсса хъамитайпалул сурат?
— Ттула нину ПатIимат. ДакIний дур, ниттил оьрмулул 34 шинаву рирщусса сурат ттула итталун дагьну, му сурат­рая нава я батIин къабюхълай ивкIсса чIунгу.

13. Вина кьамулсса чув-ада­минал сурат?
— Ттула буттал сурат. Адаминаву дикIан аьркинсса гьарца хасият дусса чув ия ттул ппу.

14. Агарда бюхъайсса бивкI­ссания, инава ци кIанттай, ци чIумал увну ва ци билаятрай яхъанай ччива вин?
— На чIявусса билаятир­ттайн ивссара ттула оьрмулуву. Вана уттигъаннугу ивкIра Германнаву. ТIайлар, тай хъинну хьхьичIунмай лавгсса, гьарца аралуву итххявхсса билаятру бур. Аммарив дакI ялагу ва жула Дагъусттаннай, зунттал билаят­рай дакъа дигьакъалагай, щяв къалаяй. Ва нава увний, лявхъуний ччива.

15. Ссаяту бикIай вил яла хъунмур пахру?
— Ца кIира-шанна шинал хьхьичI ца кIанай цаннал на кIул уллай ура цаманащал, «Ва Буршиятусса Оьмар-ХIажинал арсри» тIий.
ДакIнивун, щала чурххавун мукунсса пахру багьуна ттула бу­ттаяту, гукунсса буттал арсрахха нава тIисса.

16. Цукунсса дур виятурасса къарязишиву?
-Ттун ххан бикIай лагма-ялттумигу нава кунмасса бусса. Щялмахъ бакъасса, лавмартшиву дан дакIнийнмагу къабагьай­сса. Бигьану вихшала дишай­сса ура на.

17. Яла къаххирамур дук­ра?
-Му суалданухьхьун жаваб дулаймагума ттун ххуй къаизай.

18. Яла ххирамур дукра?
-Ххирар ттула кулпат­ Адал бувсса экьинанисса, виврарахунсса буркив.

19. Ссаяту бикIай яла хъунмур хIучI?
-ХIучI бикIай, нава сагъну ва дунияллий уна, ттула оьрчIан ца зат-апатI къахьуннав тIисса. Вайксса миллатру яхъанахъи­сса жула республикалий цаннайн ца щусса, цаннайн ца биян бувксса ишру къахьуннавгу тIий икIара.

20. Хьуссарив вил оьрмулуву винна инара ттинин багъишла ритан къахъанахъи­сса къел?
-Хьуссар, ца иш 50 шинал хьхьичI. Амма ва ттувува битанна.

21. Лавгсса заманардава­сса цIанихсса инсантурава­сса цуманащал хьунаакьин ччива вин?
-Къаччива щищалкIуйгу хьунаакьин.

22. Цукунсса бур, вил пикрилий, лакрал миллатрал яла хъунмур буруккин, цукунсса бур мунил ялун бучIантIимур?
-Яла хъунмур буруккин бур ца 20-30 шинава лак Лакку билаят бакъа личIанссархха тIисса. Ваксса гьунар бусса жула миллат дунияллийх ппив хьуну бур. КIий къабацIаврийгу аьй дуллай акъа­ра. Гьарма ур цала маэшатрал хъирив най цанма къулайнийн. Вай гьантрай Лаккуй хIукуматрал даражалийсса хъамал бия. Юсуп ХIамидовичлул ихтияр дулурча, кIийгу гьаз бан ччай уссияв ва масъала.

Жулла район шяраваллил хозяйствалуха зузисса, ризкьи, хъу-лухччаха зузисса район дур. Амма, ттул пикрилий, жула ппухълу хъу-лухччинул халкь бивкIсса ххай акъара. Генетикалул чулуха жува аьрщараха, лух­ччинуха зун лявхъу­сса халкь бакъа­сса ххай ура. Жува буру куртIну пикри бан бю­хъайсса миллат. Жува буру канилгу ус­ттарсса, бакIралгу аьрипсса халкь. Магърибуллал билаятирттайн бияннин цIаларгсса заргалтал, усттар­тал бивкIун бур жула. Циванни вай пишарду лахьхьин буллансса цехру хIакьинугу Лаккуй къатIитIин, къащурущи буллан тIий ура.

Уттизаманнул оборудованиягу дирхьусса филиаллу Ла­ккуй къатIитIин? Ваксса гьунар бу­сса, цIа ларг­сса миллат дунияллийх ппив шаву – кьамул бан захIматсса ишну чIалай бур.
Ялагу, лакку маз буру­ччав­рицIун бавхIумур масъалалий ацIлай, учинна, хIакьинусса кьини миллатрал маз ябаврил хъунмур гьануну вана ва «Илчи» кказит бур. Ва буруччинсса чаранну лякъаву гьарцагу лаккучунал ялувсса буржри.

23. Ци дахчилай дур хIакьину Да­гъусттаннахун, цил аьнтIикIасса кIанттун ва надирсса миллатирттан лавхьхьуну, ххуйнугу, ххаллилнугу ялапар хъананшиврул?
-Тиха-шихасса цучIав жухуна ахчилай акъар Дагъусттан ххаллилну яхъананшиврул. Жува укун личIаврил хъунмур багьана-савав жувару. Ттинин республикалул бакIрай бивкIминнал итабавкьусса гъалатIругур. Жула халкь цахунма цивппа бивчуну кьабитавугу каялувчитурал гъалатIри. Гьарма ия цала хIарачат цува буллай, цала кулпат бакI букканмур цува буллай.