АхъницIунсса маслихIатру
Колорадуллал гъангъаратIи – хъудугьул душман
Хъуруннай, ахъуву, дачардай жура дугьаймуниву ца яла агьамсса кIану бугьлай бур нувщул, амма му ххяххан баврицIун диялсса дайшишру дуллай бур колорадуллал гъангъаратIул. Архсса Амерканава жучIанма бувкIсса зиянчитал бат буван ишла дувайсса химиялул сурсатругу чIярур, амма ми тара-тагу дагьлай дур жулла ссупрардайн, жула цIуллу-сагъшиврунгу хъунмасса зарал биян буллай. Къачанни инсаннал цIуллу-сагъшиврун зарал къабиянсса куццуй нувщул (мукунна бадиржандалул, помидорданул) бакIлахъия ласаврицIун кабакьу буллалисса халкьунналми дарманнугу.
Днепропетровскалий «Гьанна» цIанилусса ттучандалул заказрайну дурну дур колорадуллал гъангъаратIунсса укунсса гьайкал. Ххарину бур гъангъаратIи цищава щала Европа ва бачIи Азия ясир буван шаврия
Циванни захIматсса ва зиянчи ухлаган ан?
Цалчин, Американаву чIявухьурчагу, жулламур материкрал тIабиаьтраву ва щулгъилул душмантал хъинну чансса бусса бур.
КIилчин, мунин лувгъи хъанансса шартIругу къулайсса дур – гъинтнил дянив колорадуллал гъангъаратIул 350-нния 1000-ннийн дияннинсса ккунукру дичайсса дур. КIилчин, колорадуллал гъангъаратIул бухIайсса бур хъунмасса хIаллайсса ккаши ва муния махъгума цIуллу-цIакьсса оьрчIру дуккан дувайсса дур.
Шамилчин, вайннуща ацIрахъул километрардайсса манзил битан бюхъайсса бур. Мукьилчин, цал архIал аьрщарал хъунмасса кIанттай дуван бюхълай бакъар вай бат бувансса давуртту, мунияту ца кIанай марцI бувну махъ цамур кIаная левххун букIлай бур гиккун цIунилгу.
Бердянск шагьрулий дацIан дурсса колорадуллал гъангъаратIи батIлатIисса дачниктурансса гьайкал
Халкьунналми дарманну
Вайннуву яла хьхьичIавамурну ва вихшала дишинмурну бур гъангъаратIив ва миннул ккунукру дирчусса нувщул чIапIив канил батIаймур кьяйда. Мигу жулва инсантурал батIай навт бусса банкалувун ягу бадралувун. Навтлил кьанкь къаххирасса иш бухьурча, навтлин кIанай цIил аьнтсса щин ишла дуван бучIиссар. Амма ва кьяйда ишла буван бучIир, нувщи бувгьусса кIану къахъунмасса бухьурча. Гектардайсса хъуруннайх къазананссархха инсан, канил банкагу дургьуну. Шикку бучIину лякъинтIиссар лах зурзу бувайми ва уртту-щинал пурх учайми кьяйдарду.
Бищара нувщуйх муркъал лах
Ччимур цамур луххаягу кумаг хьунтIиссар, амма ми цинявннуву колорадуллал гъангъаратIун яла къаххирамур бусса бур муркъал (береза) лах. Лах нувщул къатIрайн зурзу бувнугу хъинссар кIюрххицIунмай, нувщул чIапIив хьхьемал ягу хьхьурай ларчIсса гъарал хъавтусса чIумал (ца соткалийн луххал ца кило хIисавну). Лах нувщуйх зурзу буллан хьхьичI кIувчIуну хъинссар.
Шагьнал лачIал иникьали
Мукунма кIюрххицIун, нувщул чIапIив хъавтуну бунува, миннуйх шагьнал лачIал (кукуруза) иникьали зурзу дурну хъинссар. Ми дуркусса гъангъаратIив литIайсса бур.
Гипс ягу цемент
Мукунма нувщул къатIрайн зурзу буван бучIиссар гипс ягу цемент.
Гьивхьхьул чIапIив
Гьивхьхьул щюллисса чIапIал 1 ккилорайн кIирисса, щаращисса щинал 10 литIра дуртIуну, кьалакьигу ларкьуну, 5-7 гьантлий диртун, диргьуну, пурх учин аьркинссар нувщуйн.
БучIиссар мува кьяйдалий кьаркьсса гьивхьхьул макьартту ва кьавкьсса чIапIив (300-400 грамм щинал 10 литIралийн) ишла бувангу.
Лажин хIадур дурссар
Бадрижамал Аьлиевал
