Ххуйсса даву дурунни Вихьуллал шяраву. Шяраваллил хьхьичIсса «База» тIисса кIанттай цакьнива буссия жагьилтуран футболданий буклансса ва цаймигу тIуркIурду буллансса кIану ккаккан бувну.Вана утти, та кIанттул лагма-ялтту инсантуран къатри дуллансса аьрщи ккаккан дурну духьукун, стадион ссуссукьу къабан, ванил лагма дургьунни къери.
— Шикку жу бантIий буру стадион. Ванил утташиву 70, лахъишиву 100 метра дуссар чапар. Ва чапар дугьансса харжлугъ дачIи администрациялул, дачIигу жула жяматрал давурттал чIарав мудангу ацIайсса Щимаев Шяъваннул ва жагьилтурал дуллунни. Мукуна кумаг буллай ур БарцIулавхъал тухумраясса, Краснодардай яхъанахъисса, МахIаммадов Аьлигу.
Ванал цакьнивагу эксковатор буллуна шяраваллин, — тIий буслай ур Вихьуллал администратор СайкIу Сулайманов. Ванал тавакъюрайн бувну кIицI дуллай буру мудангу укунсса иширттал чIарав бацIлацIисса жагьилтурал цIарду: Сулайманов Сулайман, Амиров Аскандар, НухIов Чунта, ХIусайнов Альберт, МахIаммадов Оьмари, АхIмадов Марат, Чупанов Арсен, ХIасанхIусайнов Оьмар, Кьадиев Оьмар, Кьадиев ХIасан, Чупалаев Рамазан. Вихьуллал шяраваллил къинттуллух дуссар БартIуар тIисса кIанттай ччянирасса хIатталу. КIа хIатталлил лагма дугьансса 208 метра къерттарал ласунсса арцу дуллуну дур цува заллусса хъузалал хозяйство дусса Ттугъайлавхъал ХIасаннул. ЧIал къавхьуну кIа давугу дуллансса пикрилий бур.
ХIажимурад ХIусайновлул
