[dropcap]А[/dropcap]ьпалухьхьун лавгсса инсаннал бивкIу ляличIинува кьурчIи бивзшиву буслай, муная хIурматрай ва дазу дакъасса гъирарай гъалгъа тIутIийни, му инсан ттунагу кIулну къаикIаврий хIайп тIисса асар ликкай дакIний. Мукунсса асар бувххуна ттувун Зумаритавал зуруй Бархъаллал шяраватусса ХIаммадлул душ МахIаммадова Мяи дунияллия лавгсса хаварду баллалисса чIумалгу. Шяраваллил агьулданул тIийкун, Мяи (Каспийскаллал жяматран ва Мааьзатри ) «Бархъаллал Нину» бивкIун бур, маслихIат цIуххингу, дакIниймур бусангу ваничIан бачайсса бивкIун бур.
ПатIимат Рамазанова
[dropcap]Б[/dropcap]увну бур Мяи 1927 шинал Бархъалав, чIявусса оьрчIру бусса кулпатраву. Ванил шама уссу, шанма ссу бивкIун бур, Мяи – чIанма-чIивимур. КIия-кIия уссу, аьралий кIулшивурттугу ларсъсса хIаписартал, бюрунттив хьусса Карин ва МахIаммадрасул аьрайва ливчIсса хажалатгу духIан багьну бур ванин. Мяи щар хьуну бур цала шяравучунан, Къайбулатлул арснан Оьмардун.
[dropcap]В[/dropcap]агу, мяйва оьрчI бусса къушлий хъуна хьусса, кулпатравугу хъунама ухьувкун, ччясса оьрмулий ичIурассагу, кьатIухссагу давурттал хъар ласун багьсса, захIматраву савсъсса, сивсусса жагьил ивкIун ур. 1942 шинал аьрайн лавгун, Ленинград шагьрулул чIаравсса частьравун агьну, блокадалул тIюпангу бувхIуну, дяъвилул къизгъинсса цIаравухгу увккун, орденну ва медаллугу хъазамрай ларчIун, зана хьуну ур.
[dropcap]А[/dropcap]ьрайн уциннин Каспийскалийсса сянаткартурал училище бувккусса Оьмар слесарьнал касмулий зий ивкIун ур оьрмулухун, нажагьнан дакъа къадулайсса яла лараймур 5-мур разрядрангу лайкь хьуну. Зий ивкIун ур сайки 45 шинай Каспийскаллал «Дагдизель» заводрай. Лайкь хьуну ур «ЗахIматрал ЯтIул Ттугълил» ордендалунгу, «Мусил кару» тIисса хIурматрал лишандалунгу, цаймигу захIматрал бахшиширттангу. Ванал сурат шагьрулул ХIурматрал улттуя хIура къархьуну дур. Тай шиннардий Каспийскалийн бучIайцири сайки цинявппагу бархъал ликкайсса къушну бивкIун бур Оьмардул ва Мяил къуш.
— Мааьзатлул, Мяи-бавал, хасиятирттаву хьхьичIмурну дия дакIнил гъилишиву. Дяъвилул чIумул ишру оьттувух ва къюкIливух буккан бувсса, аькьлу-кIулши хъуннасса, ласнал ляхъин лавай буллалисса, ихтилат аьчухсса, дуниял чаннану чIалачIисса, чирахъну лавхъсса инсан бия Мааьзат. ЧIаравва, чIаххуврайгу буну, на вайнначIа хъунма хьуссара учирчагума, тIайлану хьунссар, ниттил цила оьрчIаха куннасса аякьа гьарманаха дикIайва.
[dropcap]Щ[/dropcap]алвагу агьулданул зума-мазрай дуссар «Мяи-бавал ттул оьрмулуву хъунмасса кIану бувгьуссар» тIисса калима. Мяи-баващал архIал дакIнил ца агьамсса бутIагу лавгунни, — тIий, сайки хъювсул буклакисса кIанттайн бияннин дакIнийн бутлай бур Мяил мачча душ Мариян Кьаландарова. Оьмардул ва Мяил арс ва душругу, миннал наслугу, нину-ппу кунма, хIарачат буллалисса, дурккусса, захIматрал гьаз бувсса агьлу бур.
Душру Маржанат ва Раисат хIакинтал бур, личIи-личIисса давурттай зий, агьалинан бусравну бур. Арс ХIаммадма, зувинниха лирчусса шиннардий ихтиярду дуруччай органнай личIи-личIисса къуллугъирттай зий ивкIсса, Лакрал, Буйнакскаллал, Каспийскаллал ОВД- лул хъунаманугу, МВД-лул министрнал хъиривманугу зий ивкIсса, Дагъусттаннал агьалинан ххуйну кIулсса инсан ур. Цувагу Каспийскалий мина дирхьуну ур.
Дагъусттаннай Бархъаллал агьулданул цIа ирсирай гьаз дурсса, чумартсса агьулданул варистал хIисаврай Оьмардул ва Мяил цIа личIантIиссар миннал оьрчIал оьрчIайгу.
