Ларгсса хамискьини жулла республикалул АПК-лул масъалартту ххал бигьинсса мурадрай увкIун ия Аьрасатнал шяраваллил хозяйствалул министрнал хъиривчу Жамбулат Хатуов.Ванащал мукунма бувкIун бия билаятрал даражалийсса цайми-цайми къуллугъирттал вакилталгу.
Залму АьбдурахIманова
[dropcap]А[/dropcap]ьрххилул цалчинмур кьинира Дусшиврул къатлуву хьуна республикалул хасъсса министерстварттал, идарарттал, районнал ва шяраваллал хозяйстварттал отделлал каялувчиталгу гьурттусса батIаву. Мажлис бачин бувну ия ДР-лул ХIукуматрал председатель Артем Здунов.
— Республикалул шяраваллил хозяйствалул аралуву ца яла чялишну ва лябукку буну хьхьичIуннай хъанахъиминнун ккалли хъанай дур ппиринж бугьаву, ризкьи ябаву, къюмайтIутIи бугьаву ва миннуя мюнпат ласаву. Махъ шиннардий хъуннасса къулагъас дуллай буссар хъуруннайн, лухччайн ва багъирдавун щин дуцайсса мелиорациялул аралух. Ва шинал, нигьа къабувсун, жуща сивсуну бювхъунни щин дуцинсса давурттан 500 млн. арцул итабакьин. ХIасиллу ххуйсса хьуншиврийнсса умуд хъунмасса бишарду, — увкунни премьер-министрнал.
Хъирив цала ихтилатраву Жамбулат Хатуовлул кIицI лавгунни ялун нанисса 5 шинал мутталий билаятрай бакIрайн лавсун бушиву экспортрай нани данмур кIилий чIяру дан.
— Регионнай кьамул дуллалисса планну дузрайн дуккан давриву федерал даражалийсса кабакьавугу дикIантIиссар. Жун кIулли зул республикалул шяраваллил хозяйствалул потенциал. КIулли зул аграрийтал хъинну зун гъира бусса, маэшат бан кIулсса бушиву. Республикалул каялувчитуращалгу, хаснува АПК-лий зузисса зул пишакартуращалгу, жул дуссар хъинну нахIу-хIаласса, цаннан ца бувчIусса арарду, — увкунни министрнал хъиривчунал.
[dropcap]Б[/dropcap]атIаврий мукунма гьаз бувна ваниннин ца-кIива зурул хьхьичI Дагъусттаннай дикIул багьри гьаз хьуну бивкIсса масъалагу ва мунийн бувну ккавксса чараннугу.
ДР-лул шяраваллил хозяйствалул министр Аьбдулмуслим Аьбдулмуслимовлул, республикалул АПК-лул аьмсса тагьардания буслай, кIицI лавгунни ятту-гъаттара ябавриву билаятрай Дагъусттан цалчинмур кIанай бушиву ва къюмайтIутIи бугьавриву – кIилчинмур кIанай. Ванал бусаврийну, ларгмур шинал республикалул бюджетрава итадаркьусса 316 млн. арцух вайннал машан ларсун дусса дур 230 сельхозтехника.
— Дагъусттаннал АПК-лул ца яла приоритетми арардуну хъанахъиссар щин дишаврил, ппиринж бугьаврил ва ризкьи ябаврил арарду. Утти, мисалдаран, щин дуцаврилми давурттан республикалул бюджетрава 500 млн.арцул итабавкьуну бухьувкун, жуща бюхъантIиссар 17 азарда гектар аьрщарал щинал щаллу дан ва ялун-тулун 1 миллиардрансса продукция дучIан дан, — кунни вице-премьернал.
Аьрххилул лагрулий Жамбулат Хатуов ивунни Талминскаллал щин дишай системалул ца яла агьамсса ва уттизаманнул тIалавшиннардай дуллалисса Чонтауллал гидроузелданийн. Пишакартурал бусаврийну, му канал марцI даврийну 2,1 азарда гектар аьрщарайн щин дишин бюхъантIий бусса бур. Объект дурну къуртал хьунтIиссар ва шинал ахирданийннин.
