Цасса паччахIлугърал экзамен гьарицагу выпускникнал оьрмулуву хъуннасса агьамшиву дусса ва жаваблувсса иш хъанай бур.
[dropcap]Э[/dropcap]кзаменну дуллуну махъгума выпускниктуран хъунмасса хIаллай ялагу экзаменнаясса нигь-ццах хъамаритлай дакъар. Дуклаки оьрчIан ЕГЭ-дая хъуннасса стресс хъанай дур, ай, балики, дулун къахьурча цибави тIий, вас-ццахлий бур, нину-ппугу оьрчIал цIуллушиврия буруккинттарай бур.
— Ва ци къияр оьрчIай дуллалисса, — тIий, рязи бакъа бур ми.
ЕГЭ-далшиврий Аьрасатнаву чIявусса баларду хьунни. Цавайннаща му дулун къархьунни, цавайннан ца-ца балл биял къавхьунни. Цикссагу ишру хьунни экзамен дулун бувкIсса оьрчIру аудиториялуву хIалдания лавгун багьсса. Хьунни ишру выпускниктурал цанма цала бувсса. Укунмагу экзаменнал ццахханну руртсса оьрчIру, щябитлай бур чIавахьултту лавкьусса, гьава кIирисса классирттаву, оьсса къаралчиталгу ялув бацIан бувну. Ва тагьарданий оьрчIан кIулмургума хъамабитанссар.
Шинал лажиндарай, зуща экзаменну дулун къахьунтIиссар тIий, учительтурал нигьал бувсса оьрчIру, укунсса шартIирдай экзаменну дуллалийни, гьанавиххи хъанай бур, гьалак буклай бур.
[dropcap]М[/dropcap]унияту, нитти-буттан най буна хIадур буллан аьркинни цала оьрчIру укунсса шартIирдайн. Учительтуралгу, нигьал къабуллай, маслихIатрайну, нахIусса махъ-ихтилатрайну бувчIин буллан аьркинссар, хIарачат барча, экзамен дулун цичIар захIматшиву къадикIантIишиву. Царагу экзамен къабагьассар оьрчIал жандалул.
Та хьунтIиссар нигь дакъа щинавун бучIлан
Ссавур духларгун ялугьлан бикIару жува гъи дучIаннин, дустуращал, гъан-маччаминнащал хьхьирийн занан, хьхьирия неъмат ласун. Амма, цуксса хIайпнугу, экспертътурал къадагъа дихьлай бур хьхьирил зуманивсса пляжирттайн заназаврин ва щинавун бучIаврий. Ванин багьанагу хъанай бур щин бучIиссаннуяр цукссагу ххишалану чапалну душиву ва мукунна щинавун бучIаврия инсантурал цIуллу-сагъшиврун зарал бушиву, сукку хьун бюхъайшиву инфекциялул азарду.
Щин чапал дуллай дур хъунмурчIин хьхьиривун нанисса канализациярттал.
Хьхьирил щин чапалну душиврия гьарица шинах, сезон дайдишайхту, баян буллан бикIай марцIшиврул ялув бацIаврил къуллугърал пишакартал. Пляжру ва хьхьирил щин чапалну душиву сававну жучIанма букIлакIисса туристалгу чан хъанай бур.
Умуд бур хасъсса органнал, ва иш хIисавравун лавсун, экологиялул тагьар къулай дансса чаран лякъинссар тIисса.
ХIакьсса ягу интернетравусса оьрму?
ХIакьсса ягу интернетравусса оьрму? Балугъравун къабивминнахьхьун ва суал булурча, гьай-гьай, чIявуминнал интернет оьрму язи бугьантIиссар. Щалагу дунияллийх интернет ппив хьусса цIанасса заманнай чIявуми хIакьсса оьрмулия арх бувцун бур, инсантурачIа кувнначIа кув махъ-ихтилатрай щябикIаву, хьхьичIва кунма, дуссухун батIаву хъинну чанну дакъа лирчIун дакъар, миннан лагма-ялтту, чIахху-чIарах хъанахъимур хIисав хъанай бакъар.
Телефоннал, компьютердал ясир бувми ялу-ялун чIяву хъанай бур.
Ттула пикрилий, хъунмасса гъалатI итабакьлакьиссар оьрчIру телефоннавусса, компьютердайсса мультфильмрдай бялахъан буллалисса нитти-буттал. Нитти-буттал цала оьрчIру итххяххан баву мурадрай бувсса ихтилатрачIан ва тIуркIурдачIан цичIар къадучIайссар. ХIайп, цуксса къаччайнугу, хIакьину нажагьсса бур луттирду ккалаккисса. Оьрмулуву хьунабакьлакьисса масъаларттая ливхъун, виртуал дунияллийн букIлай бур чIявусса инсантал ва мунийн хIакьсса оьрмулийн кунма вардиш хъанай бур.
Соцсетирдаву инсантурал хIакьсса оьрмулуву кIучI дуллалисса къаххуйсса хасиятругу ялун личлай дур.
Жула оьрчIру ва масъалалия мурахас бан хьхьичIра-хьхьичI жура, хъуниминнал, эбрат ккаккан дан аьркинни, компьютерду, телефонну чулий дирхьуну, жула оьрчIащал ххишаласса чIун гьан дуллан аьркинни. ОьрчIру мюрщину бунува луттирду ккалай аьдат бан аьркинни. Му чIумал жула оьрмугу баххана хьунтIиссар.
Камила МахIаммадова,
ДГУ-лул филологиялул
факультетрал журналистикалул отделениялул 2-мур курсрал студентка
