Къичурлухи
КутIасса справка
Къичурлухиял шяравалу диркIссар Щуну-Зунттул урчIамур хъаттиралу, Ваччату 1-мур ЦIувкIрав нанисса ххуллул мукьилчинмур километралул манзилданий.
ХIХ ттуршукулул ахирданий Аьрасатнал паччахIлугърал дурну диркIсса ккалданийн бувну Къичурлухиял шяраву диркIун дур 75 тIюва. Хъун дяъви байбишин хьхьичIсса ппурттуву бивкIун бур 78 къатта.
Колхоз сакин дурну диркIун дур 1936-1937 шиннардий. Къичурлухи бакъассагу, мивун цачIун хьуну диркIссар кIа даралувусса ялагу мукьра шяравалу – Чакъал, Бярнихи, Тукъатул ва Оьллауртти.
Дяъви байбивхьусса шинал Къичурлухату аьрайн лавгун ур 38 чув, минная зана къавхьуну ур 19.
Лаккуя арандалийн бизан бувну махъ колхозравун духлай диркIсса ми ххюрагу-ряхрагу шяравалу салкьи хьуссар ца кIанттай – Кишайннал шяраву.
[pullquote]Лак Лаккуя бизан бувну 75 шин шаврийн[/pullquote]
Муния махъ га шяраваллингу дирзссар Чапаево тIисса цIусса цIа. Гикку сакин дурсса колхозгу диркIссар Чапаевлул цIанийсса. Колхозрал председательнугу увчIуну ивкIссар Къичурлухиял вакил Нуруллагь Исяев.
Аьрасатнал паччахIлугърал аьралуннаву ХIХ ттуршукулул дайдихьулий генералнал чиндалуву къуллугъ буллай ивкIун ур АхIмади Сулайманов тIисса Къичурлухиял жяматрал цIанихсса арс. Аьрай дурсса къучагъшивурттахлу мунал хIалал бувну бивкIун бур Георгиевлул мукьвагу хач.
Къичурлухиял шяравасса Арсен Хайдакьов зий ивкIссар ЦIуссалакрал райондалул администрациялул хъунаману.
Дагъусттан Республикалул спортрал дунияллий машгьурну дуссар АхIмадхан Амирхановлул ва мунал кIия арснал — Камиллул ва Амирханнул цIарду.
ХIакьинусса кьини Къичурлухиял жямат цацIунмасса агьалинащал алхIал салкьи дуллай бур цIусса кIанттай («Новостройрай») цIусса мина.
