Июньдалул 14-нний Дагъусттаннайн къуллугърал аьрххилий увкIсса АьФ-лул ХIукуматрал Председательнал 1-ма хъиривчу – АьФ-лул финансирттал министр Антон Силуанов гьуртту хьунни «Корпорация «МСП» АО-лул стратегиярттал сессиялий.

Муний гьуртту хьунни мукунма: АьФ-лул экономикалул министр Максим Орешкин, АьФ-лул Ухссавнил Ккавкказуллал ишир­ттал министр Сергей Чеботарев, ДР-лул ХIукуматрал председатель Артем Здунов, «МСП» Корпорация» АО-лул гендиректор Александр Браверман, ДР-лул ХIукуматрал председательнал 1-ма хъиривчу ХIажимахIаммад ХIусайнов, ДР-лул Ишбажаранчишиврул ва инвестициярттал агентствалул каялувчи ХIажи ХIасанов.

ЛичIи-личIисса масъаларттан хас бувсса ккуркки столлай гьуртту хьунни Ухссавнил Ккавкказуллал региондалиясса чIявусса вакилтал. Федерал каялувчитурал жулла республикалий ххал диргьунни укунсса национал проектру: «ЗахIматрал лябукку ва зузи кIанттурду», «ЧIиримур ва дянивмур ишбажаранчишиву ва цивппалусса ишбажаранчишиврул сиптардацIун кабакьаву» ва «Дунияллул халкьуннал дянивсса кооперация ва экспорт».

Микку махъ лахълай, Антон Силуановлул увкунни: «Жу хьунабакьлай буру ишбажаранчитуращал, кIул хьун ччай бур зул пикри зулла давурттал хIакъираву, захIматшивурттал, цIусса давуртту дайдишин, зузи кIанттурду дузал баврин ци аьркинссарив».

Гипсрал завод баврицIун дархIусса проектрая бувсунни «Матис» ООО-лул гендиректор Турпалаьли МайхIажиевлул. Мунал тIимунийну, проектраясса мюнпат хъанай бур бюджетравун 138 млн. къуруш дучIан даву ва 180 зузи кIану дузал баву. Проектрал багьа бур 1 млрд. ва 168 млн. къуруш. Бувсунни му проектрангу кумаг бан тIий бушиву.
Цаллами проектирдащал кIул бунни мукунма Кабардин-Балкарнал респуб­ликалул ва Ставрополлал улклул инвестортурал.